Liderët evropianë po diskutojnë një plan për krijimin e një zone tampon prej 40 kilometrash midis Ukrainës dhe Rusisë, si pjesë e përpjekjeve për të arritur një armëpushim të qëndrueshëm në luftën që po hyn në vitin e saj të katërt.
Sipas burimeve të Politico.eu, plani është mbështetur nga Moska, por ende nuk ka marrë miratim nga Kievi. Nëse avancon, nisma do të kërkojë angazhim ndërkombëtar për monitorimin dhe mbikëqyrjen e zbatimit të armëpushimit.
Franca dhe Britania e Madhe pritet të udhëheqin praninë ndërkombëtare, ndërsa Gjermania dhe Polonia shfaqin rezerva, për shkak të shqetësimeve mbi dobësimin e mbrojtjes së NATO-s në lindje.
Nga ana tjetër, SHBA-ja ka zgjedhur të qëndrojë në distancë nga propozimi, duke mos planifikuar një prani të drejtpërdrejtë ushtarake, por duke ofruar mbështetje të kufizuar në inteligjencë dhe mbulim ajror.
Propozimi është rezultat i një dëshpërimi në rritje në mesin e aleatëve të NATO-s, ndërsa sulmet e fundit ruse në Kiev dhe mungesa e progresit në negociata po shtojnë trysninë për një zgjidhje të ndërmjetme.
Zyrtarët evropianë janë të kujdesshëm për rreziqet politike dhe ushtarake të krijimit të zonës tampon, sidomos për faktin se integriteti territorial i Ukrainës është në rrezik nëse vendime të tilla merren pa përfshirjen aktive të saj.
Sinjali – aty ku e vërteta flet para lajmit!