Një shpërthim i madh tronditi veriun e Kosovës, në orët e vona të së premtes.
Hedhja e 20 kilogramëve eksploziv shkaktoi dëm të madh në kanalin e Ibër – Lepencit, që gjendet në fshatin Varagë të Zubin Potokut.
Kjo rrezikoi shumë seriozisht mbetjen pa ujë dhe pa rrymë të qytetarëve të Kosovës.
Por, reagimi i ekipeve emergjente, të Ibër – Lepencit dhe institucioneve tjera relevante ishte i shpejt.
Dëmtimet e mëdha u minimizuan në çështje orësh, ndonëse disa zona të vendit mbetën pa furnizim me ujë ndër to komunat si: Mitrovica e Jugut, ajo e Veriut, Fushë Kosova, Obiliqi e Drenasi.
E punët për sanimin e plotë dhe eliminimin e rrjedhjes së ujit, po vazhdojnë edhe sot.
Ekipi i Klan Kosovës ishte në vendin e ngjarjes dhe ka përcjellur nga afër situatën.
“Gjendja është pak më e mirë sesa ka qenë më herët. Këtu është bërë sanimi me disa shtylla të betonit të cilat përkohësisht e mbulojnë pjesën ku veçse rrjedh uji. Ndërkaq pritet që së shpejti të sanohet e gjitha dhe të mos ketë më probleme me çështjen e sanimit të ujit në zonat e tjera”, raporton gazetarja e Klanit, Altiana Zogaj.
Derisa në përcjellje të punimeve ishte edhe kryetari i Zubin Potokut, Izmir Zeqiri.
Po ashtu aty janë edhe pjesëtarë të KFOR-it që po e ruajnë atë pjesë.
*Klikoni KËTU për t´u bërë pjesë e kanalit zyrtar të Klan Kosovës në Viber.
*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.
