Ministria e Mbrojtjes e Rumanisë ka njoftuar se të shtunën ka ngritur në ajër dy avionë luftarakë F-16, pasi një dron ka shkelur hapësirën ajrore të vendit gjatë një sulmi rus ndaj infrastrukturës ukrainase pranë kufirit.
“Droni nuk fluturoi mbi zona të banuara dhe nuk përbënte një rrezik të menjëhershëm për popullsinë”, thuhet në deklaratën e ministrisë.
Sipas njoftimit, qytetarët në qarkun juglindor të Tulceas, pranë Danubit dhe kufirit me Ukrainën, janë paralajmëruar të strehohen. Avionët rumunë zbuluan dronin në hapësirën ajrore kombëtare dhe e ndoqën derisa ai u zhduk nga radari 20 kilometra në jugperëndim të fshatit Chilia Veche.
Rumania, një shtet anëtar i BE-së dhe NATO-s që ndan një kufi prej 650 kilometrash me Ukrainën, ka parë pjesë dronësh rusë që kanë rënë në territorin e saj në mënyrë të përsëritur që nga fillimi i luftës.
Ndërkohë, edhe Polonia ka reaguar duke ngritur avionë polakë dhe aleatë për shkak të një kërcënimi të ngjashëm me dronë dhe ka mbyllur një aeroport në Lublin, tre ditë pasi kishte rrëzuar dronë rusë në hapësirën e saj ajrore, me mbështetjen e avionëve të NATO-s, raporton reuters.
NATO njoftoi të premten se do të forcojë mbrojtjen e krahut lindor të Evropës, pas incidentit në Poloni. Ky ishte rasti i parë i njohur i rrëzimit të një droni nga një anëtar i aleancës perëndimore gjatë luftës në Ukrainë.
Ligjvënësit rumunë kishin miratuar më herët gjatë këtij viti një ligj që i mundëson ushtrisë të rrëzojë dronët që shkelin ilegalisht hapësirën ajrore në kohë paqeje, bazuar në nivelet e kërcënimit dhe rrezikut për jetën dhe pronën, por sipas Reuters, ky ligj ende nuk ka rregulla zbatimi të miratuara.
Sinjali – aty ku e vërteta flet para lajmit!