Ruben Amorim ka hedhur sërish poshtë sugjerimet se është pranë shkarkimit nga posti i trajnerit të Manchester United, pas një tjetër humbjeje zhgënjyese në fushën e Brentfordit.
Trajneri portugez ka vazhduar këtë sezon aty ku e la sezonin e kaluar, me “Djajtë e Kuq” që vazhdojnë të duken pa ide dhe pa drejtim të qartë.
Me ekipin që ende nuk ka arritur të mbledhë 10 fitore në kampionat nën drejtimin e Amorimit, koha po mbaron.
Jo vetëm që United ka fituar vetëm nëntë nga 33 ndeshjet e Ligës Premier nën drejtimin e tij, por skuadra ende nuk ka arritur të regjistrojë më shumë se një fitore radhazi.
Është kthyer në një zakon gjatë kohës së Amorimit që një fitore mbresëlënëse – si ajo e javës së kaluar ndaj Chelseat – të pasohet nga një disfatë po aq e thellë, si humbja 3-1 ndaj Brentfordit të shtunën.
“Gjithmonë ndjehem rehat në këtë punë. Nuk jam i shqetësuar, kjo nuk është në dorën time. Do të jap më të mirën time për çdo minutë që jam këtu. Nuk shqetësohem kurrë për punën time, nuk jam ai lloj personi”.
“Gjithmonë bëj punën time. Kur fitoj, ndjehem ndryshe, kjo është normale. Por gjithmonë jam i sigurt, sepse e di çfarë duhet të bëj”.
“Gjithmonë kam marrë shumë përgjegjësi mbi shpatullat e mia. Mund të luajmë më mirë dhe duhet të luajmë më mirë. Është si një valë me ngritje e zbritje”.
“Kur fiton, ndjen që gjithçka, momenti, është me ty. Kur humbet, kthehesh në të njëjtin vend dhe lufton sërish për një fitore që mund të rikrijojë atë momentum”, ka deklaruar 40-vjeçari./Telegrafi/