Situata në fshatin Lubinjë e Epërme po përkeqësohet çdo ditë.
Përveç shembjes së dheut që ka izoluar një lagje të tërë, banorët raportojnë se është dëmtuar edhe shtylla e tensionit të lartë, ndërsa është çarë edhe gypi kryesor i ujit të pijes, duke lënë gjysmën e fshatit pa furnizim me ujë.
Sipas banorëve, shtylla elektrike është në gjendje kritike dhe rrezikon të rrëzohet çdo ditë, duke paraqitur rrezik serioz për jetën e qytetarëve, veçanërisht për fëmijët dhe të moshuarit që lëvizin në atë zonë.
Në terren nuk ka dalë asnjë ekip teknik, as nga energjetika, as nga ujësjellësi dhe as nga Komuna e Prizrenit.
Banorët shprehen të revoltuar:
“Pa rrugë, pa ujë, me shtyllë të rrezikshme mbi kokë – jemi totalisht të braktisur.”
Videoja që po publikohet tregon qartë gjendjen alarmante të shtyllës së tensionit dhe dëmtimin e gypit të ujit.
Institucionet lokale vazhdojnë heshtjen, ndërsa rreziku është real dhe i përditshëm.
Pyetja tashmë nuk është a do të reagojë Komuna, por a po pritet që të ndodhë ndonjë tragjedi?
Sinjali – aty ku e vërteta flet para lajmit!
