Real Madrid po planifikon të përforcojë repartin ofensiv për sezonin e ardhshëm dhe trajneri i ri Xabi Alonso ka piketuar një objektiv të madh: Michael Olise i Bayern Munich.
23-vjeçari francez është në një formë të jashtëzakonshme këtë sezon, me 5 gola dhe 6 asistime në 9 ndeshje për bavarezët, ndërsa në Ligën e Kampionëve ka kontribuar në 4 gola vetëm në 2 takime. Që nga transferimi i tij nga Crystal Palace në vitin 2024, Olise ka shënuar 25 gola dhe ka dhuruar 29 asistime në 64 paraqitje.
Megjithatë, një marrëveshje nuk do të jetë aspak e lirë. Bayern nuk pranon të dëgjojë oferta më pak se 100 milionë euro, shifër që mund të shkojë edhe më lart. Përveç Real Madridit, interesim ka shfaqur edhe Liverpool, i cili e sheh Olise si pasues të mundshëm të Mohamed Salah.
Michael Olise
Nëse Olise transferohet në “Santiago Bernabeu”, priten pasoja të mëdha në skuadër. Rodrygo është lojtari që mund të sakrifikohet. Braziliani u lidh me një kalim në Premier League verën e kaluar, me interesim nga Arsenal, Manchester City dhe Tottenham. Duke qenë se ende nuk ka shënuar këtë sezon në La Liga, spekulimet për largimin e tij janë gjithnjë e më të forta.
Për Alonson, Olise shihet si pjesa e fundit e mozaikut sulmues, duke pasur parasysh se tashmë ka lidhje të fortë me Kylian Mbappe te kombëtarja e Francës – dhe kjo partneritet mund të vazhdojë edhe në Spanjë./Telegrafi/