Katër persona janë vrarë gjatë natës në qytetin palestinezo-izraelit të Tamrës, në veri të Izraelit, pasi një ndërtesë banimi u godit nga një raketë e lëshuar gjatë sulmeve ajrore iraniane, sipas shërbimeve izraelite të emergjencës, shkruan Gazeta Sinjali.
Emrat dhe fotografitë e viktimave janë publikuar, duke sjellë dhimbje dhe shqetësim në komunitetin lokal.
Kjo rrit në dhjetë numrin e të vrarëve gjatë natës në Izrael, pasi gjashtë të tjerë humbën jetën në incidente të ndara në Izraelin qendror. Banorët e Tamrës shprehen të tronditur dhe të pambrojtur, raporton CNN.
“Fshatrat dhe qytetet në territoret palestineze brenda Izraelit e paguajnë çmimin”, tha një banor për CNN, duke theksuar mungesën e infrastrukturës mbrojtëse. “Nuk ka strehimore… raketat bien mbi kokat e njerëzve tanë,” shtoi ai.
Shoqata për të Drejtat Civile në Izrael konfirmon se shumë qytete palestinezo-izraelite në veri të vendit janë pa strehimore publike, zona të mbrojtura apo hapësira të sigurta në shkolla dhe institucione. Kjo situatë ka rindezur debatet për barazinë dhe mbrojtjen civile në kohë lufte.
Sinjali – aty ku e vërteta flet para lajmit!
