Presidenti i Kroacisë, Zoran Milanoviç, ka theksuar rëndësinë e marrëdhënieve të mira fqinjësore dhe stabilitetit në rajon gjatë fjalës së tij në seancën e Asamblesë së Përgjithshme të Kombeve të Bashkuara në New York.
Milanoviç tha të mërkurën se Kroacia vazhdon të mbështesë dhe promovojë proceset legjitime politike si bazë për përparim në rajonin e Evropës Juglindore, raporton zyra e tij.
“Anëtarësimi në Bashkimin Evropian nuk është një zgjidhje për të gjitha sfidat, por mbetet një nxitës i fortë i prosperitetit, gjë që është e dukshme në Kroaci. Ne promovojmë marrëdhënie të mira fqinjësore dhe u bëjmë thirrje të gjitha shteteve të përmbahen nga veprimet që dëmtojnë stabilitetin në rajon.”, tha ai.
Milanoviç gjithashtu deklaroi se Kroacia “bën thirrje për respekt të plotë për rendin kushtetues, sovranitetin dhe barazinë e tre popujve përbërës” në Bosnjë dhe Hercegovinë.
Ai përsëriti thirrjen e tij për “një fund urgjent të masakrës në Rripin e Gazës” dhe për “njohje universale të aspiratave legjitime politike të popullit palestinez”.
Presidenti kroat gjithashtu theksoi se reforma e Kombeve të Bashkuara është një “domosdoshmëri ekzistenciale” dhe se organizata botërore “duhet të përshtatet në mënyrë që të mbetet relevante dhe efektive”.
Sinjali – aty ku e vërteta flet para lajmit!