Presidenti i Republikës së Shqipërisë, Bajram Begaj, ka zhvilluar një takim me luftëtarët e parë për çlirimin e Kosovës, të cilët u stërvitën në vitin 1991 në Repartin Ushtarak të Surrelit, nga pedagogët e ish-Shkollës së Bashkuar të Oficerëve.
Përmes një postimi në Facebook, kreu i shtetit shqiptar theksoi rëndësinë historike të kësaj ngjarjeje, duke e cilësuar si momentin kur nisi rrugëtimi për çlirimin e Kosovës dhe themelimi i bërthamës së parë të Ushtrisë Çlirimtare të Kosovës (UÇK).
“Me luftëtarët e parë për çlirimin e Kosovës, që u stërvitën në vitin 1991 në Repartin Ushtarak të Surrelit nga pedagogët e ish-Shkollës së Bashkuar të Oficerëve. Kjo ngjarje duhet të marrë vlerën e peshës historike, pasi aty u ndez flaka e madhe për çlirimin e Kosovës, bërthamë e parë e UÇK-së. Nder përjetë të gjithë atyre që sakrifikojnë për shqiptarinë”, ka shkruar Begaj.
Sinjali – aty ku e vërteta flet para lajmit!