Rrobat transparente nuk janë vetëm për sfilata: pesë ide që i bëjnë të dukshme në përditshmëri
Veshjet joshëse nga pëlhura transparente, që zbulojnë atë që zakonisht mbetet e fshehur, prej shumë vitesh kanë qenë pjesë e trendeve të modës. Trendi i fundeve transparente nuk është i ri – ato kanë mbizotëruar në pasarela që në vitet ’80 dhe sot po rikthehen me një frymë moderne.
Ashtu si në sezonet e kaluara, edhe sfilatat për koleksionin vjeshtë/dimër 2025 konfirmuan vazhdimin e dominimit të fustaneve transparente dhe fundeve të lehta e të valëzuara. Chanel, për shembull, i kombinoi fundet e gjata fluide me volane me xhaketat e tij të njohura prej stofi të trashë, duke krijuar kontrast me materialet e plota; Chloe i paraqiti në stilin e saj bohem të ajrosur, ndërsa S.S. Dalí solli modele të bardha të bashkuara me të brendshme të zeza kontrast.
Edhe pse tapetet e kuq dhe pasarelat e duan konceptin e të ashtuquajturës “veshje e zhveshur”, këto nuk janë gjithmonë të përshtatshme për përdorim të përditshëm. Megjithatë, kjo nuk do të thotë se duhet të hiqni dorë nga rrobat transparente dhe magjia e tyre e hollë si mjegulla – thjesht duhet t’i përshtatni për raste të zakonshme, transmeton Telegrafi.
1. Mbi veshje me ngjyra kontrasti
Një nga mënyrat më interesante dhe shumë e lehtë për t’u rikrijuar, është veshja e fustaneve bohem transparente mbi kombinime me ngjyra të kundërta. Për të shmangur pamjen e rënduar, rrobat që vishen poshtë le të jenë të ngushta trupore, në mënyrë që silueta e fustanit të mos humbasë.
2. Në kombinim me pjesë të tjera transparente
Për ata që pëlqejnë pamje më të guximshme, kombinimi i disa pjesëve transparente (fustane, funde apo këmisha) është zgjedhje e veçantë. Në rrugët e Kopenhagës këtë gusht, vajzat që ndjekin modën shpesh kombinuan dantella me ngjyra të ndryshme, por efekt interesant vizual mund të arrihet edhe duke ndërthurur pëlhura transparente me tekstura të ndryshme.
3. Mbi një veshje të thjeshtë
Fustanet e holla të tipit slip janë shtesë e shkëlqyer për veshjet e zakonshme, sidomos kur kombinimi duket i zakonshëm e pa gjallëri. Mjafton ta vishni mbi xhinse dhe një bluzë pambuku të bardhë, dhe do të merrni një pamje moderne që tërheq vëmendjen.
4. Në çift me të brendshme të dukshme
Të brendshmet që shfaqen nën rroba nuk janë gjithmonë të papërshtatshme për ditën. Një pëlhurë e zezë që dallohet nën një këmishë transparente, i kombinuar me një xhaketë sipër, është zgjedhje ideale për raste të çliruara, si një kafe me shoqet, që mund të vazhdojë lehtësisht edhe në një dalje mbrëmjeje.
5. Si një shtresë e lehtë mbi pantallona
Fustanet dhe fundet e gjata transparente i japin çdo kombinimi një notë të papritur romantike. Edhe pse janë vetëm një shtresë e hollë pëlhure, ato e ndryshojnë tërësisht pamjen e një veshjeje. /Telegrafi/