Përzgjedhësi i Përfaqësueses së Sllovakisë, Francesco Calzona, ka publikuar të enjten listën e 27 lojtarëve për ndeshjen ndaj Kosovës, e cila zhvillohet më 26 mars në Stadiumin Nacional në Bratislavë, në kuadër të gjysmëfinales së plejofit kualifikues për Kupën e Botës 2026.
Në listën e lojtarëve, Calzona ka përfshirë edhe dy yjet, kapitenin Milan Skriniar dhe mesfushorin me përvojë, Stanislav Lobotka.
“Skriniar po lufton me një dëmtim të rëndë, po bën çmos që të jetë me ne dhe të na ndihmojë të paktën në një ndeshje. Shpresojmë që të jetë në të dyja. Lobotka tashmë po stërvitet me ekipin, por 20 ditë mungesë nuk janë të mira për asnjë lojtar. Ne besojmë se ai do të jetë i gatshëm dhe sa më i përdorshëm të jetë e mundur,” ka thënë Calzona.
Trajneri italian ka theksuar gjithashtu kthimin e mbrojtësit Martin Valjent, i cili rikthehet te Sllovakia pas rreth dy vjet e gjysmë, duke rritur opsionet në mbrojtje.
Gjatë konferencës për media, Calzona ka theksuar rëndësinë e ndeshjes ndaj Kosovës:
“Ky është një moment historik për vendin tonë. Ne nuk jemi të interesuar për asgjë tjetër përveç futbollit,” ka thënë ai, duke shtuar se pret një atmosferë të zjarrtë në tribuna.
“Një falënderim i madh për shikuesit. Nuk është hera e parë që shiten të gjitha biletat. Ata u rikthyen në stadium, gjë që ishte dëshira ime kur erdha në Sllovaki. Fakti që ata po vijnë në ndeshje tregon se ekipi ka arritur diçka. Shikuesit na kanë ndihmuar në shumicën e rasteve dhe besoj se kështu do të jetë edhe tani,” ka shtuar Calzona.
Trajneri ka komentuar edhe për skuadrën e Kosovës, duke e cilësuar atë si një përfaqësuese të rrezikshme dhe të papërshtatshme, duke theksuar mungesën e kapitenit, Amir Rrahmani, të cilin e ka stërvitur si trajner te Napoli.
“Humbja e Rrahmanit, i cili luan për Napolin, është e madhe për Kosovën. Megjithatë, ata kanë disa lojtarë cilësorë nga Serie A italiane ose Bundesliga gjermane, dhe vlera e tregut të skuadrës së kundërshtarit është më e lartë se e jona. Është një ekip i rrezikshëm dhe i papërshtatshëm,” ka deklaruar Calzona.
Ai ka shtuar se pret 100 për qind angazhim nga lojtarët në këtë ndeshje:
“Gjatë një viti e gjysmë të kaluar, gjithmonë kemi pasur probleme me përbërjen e ekipit, është njësoj edhe tani. Përveç lojtarëve të përmendur tashmë, Haraslin ka edhe probleme të vogla shëndetësore, Leo Sauer është stërvitur me ekipin për dy ditë. Megjithatë, nuk dua të kërkoj justifikim. Lojtarët që janë përfshirë e kanë sjellë ekipin këtu, është meritë e tyre. Do të kërkoj 100 për qind prej tyre dhe besoj se do të japin më të mirën e tyre, ashtu siç kanë bërë në të kaluarën. Pikëpamja ime për ta nuk do të ndryshojë, pavarësisht se si shkojnë këto ndeshje,” ka përfunduar Calzona.
Sinjali – aty ku e vërteta flet para lajmit!
