Papa Leo XIV dhe Irani kanë reaguar pas deklaratave të Presidentit të SHBA-së, Donald Trump, lidhur me tensionet në Ngushticën e Hormuzit.
“Sot, siç e dimë të gjithë, pati një kërcënim kundër të gjithë popullit të Iranit, dhe kjo është e papranueshme,” tha Papa Leo XIV për gazetarët ndërsa largohej nga Villa Barberini në Castel Gandolfo, duke iu referuar komentave të Trump.
Ndërkohë, ambasadori iranian në OKB, Amir-Saeed Iravani, bëri thirrje për rifillim të aktivitetit diplomatik dhe për zgjidhje të krizës. Ai deklaroi në Këshillin e Sigurimit se “i dërguari personal i Sekretarit të Përgjithshëm po udhëton aktualisht për në Teheran për të vazhduar konsultimet.” Iravani shtoi se Irani “është gati të angazhohet në mënyrë konstruktive me të gjitha përpjekjet e vërteta diplomatike” që synojnë përfundimin e konfliktit dhe rivendosjen e stabilitetit në këtë zonë strategjike detare.
Sidoqoftë, Irani ka paralajmëruar se nuk do të qëndrojë duarkryq ndaj kërcënimeve të cilat i konsideron “krime lufte” nga Trump. Ambasadori Iravani theksoi se Teherani do të ushtrojë të drejtën e tij për vetëmbrojtje “pa hezitim,” duke miratuar “masa të menjëhershme dhe proporcionale” në përgjigje të çdo veprimi të SHBA-së, dhe bëri thirrje që bashkësia ndërkombëtare të reagojë “para se të jetë tepër vonë.”
Sinjali – aty ku e vërteta flet para lajmit!
