Aktori i njohur shqiptar, Osman Azemi, ka dalë nga spitali pas disa muajsh trajtimi intensiv që pasoi nga një aksident i rëndë trafiku në prill të këtij viti.
Në një video të postuar në Facebook, u shfaq duke ecur për herë të parë pas 159 ditësh, duke treguar emocionet e forta të rikthimit.
“159 ditë mall për me ec”, shkroi Azemi.
Foto: Facebook
Aksidenti i rëndë ndodhi në zonën e Graçanicës, kur vetura me të cilën po udhëtonte, humbi kontrollin dhe përfundoi në një kanal anësor.
Aktori u dërgua menjëherë në spital, ku iu nënshtrua ndërhyrjeve dhe një periudhe të gjatë rehabilitimi.
Prej ditës së aksidentit e deri më tani, Azemi ka marrë mesazhe të panumërta mbështetjeje nga publiku dhe miqtë e tij të shumtë në botën e artit.
Dalja nga spitali dhe hapat e parë pas muajsh të tërë shtrati përbëjnë një moment shprese e gëzimi jo vetëm për familjen e tij, por edhe për admiruesit që e kanë ndjekur gjithmonë me dashuri. /Telegrafi/