Formimi i qeverisë së re të Kosovës ka qenë tema që është diskutuar sot në emisionin “Ora Shtatë”.
Opinionisti Azdren Shala deklaroi se pas certifikimit të zgjedhjeve, interes i Kosovës është krijimi i shpejtë i institucioneve, gjersa theksoi se s’do të ketë problem në formimin e qeverisë, transmeton Klankosova.tv.
“Unë besoj që kurdo që të certifikohen zgjedhjet, interesi i Kurtit dhe i Kosovës është me i kriju sa më shpejt institucionet. Fillimisht konstituimi i Kuvendit pastaj formimi i qeverisë. Deri këtu, si rezultat i atyre rezultateve zgjedhore, nuk kemi pasur probleme, kemi me pasë një qeveri të shpejtë, sepse janë numrat tashmë”, tha Shala.
Nga ana tjetër, opinionisti Labinot Balaj u shpreh se përmbajtja e qeverisë së re nuk do të ketë ndonjë ndryshim apo dallim nga ajo e kaluara, megjithatë, sipas tij, gjithçka varet nga dinamikat që mund të ndodhin.
“[Qeveria e re] nuk ka me ndryshu. Janë ata emra, ajo përbërje, ajo strukturë e kabinetit. Për nga cilësia nuk ka me pas ndonjë ndryshim rrënjësor. Varet edhe nga dinamikat që do të ndodhin”, tha Balaj.
Ndërkohë, gazetari Ardian Gaxherri tha i bindur se qeveria që pritet të bëhet nga VV, do të jetë e qëndrueshme, por joefikase.
“Sa i përket kabinetit qeveritar mendoj se do të jetë një qeveri e qëndrueshme, por totalisht joefikase”, tha Gaxherri.
