Presidenti i Sirisë, Ahmed Al-Sharaa, të mërkurën mbajti fjalim në Asamblenë e Përgjithshme të Kombeve të Bashkuara, hera e parë që një president i këtij vendi e bën këtë në gati 60 vjet. Përderisa ai po fliste, qindra njerëz u mblodhën para ekraneve gjigante në qytetet siriane për ta dëgjuar fjalimin, duke valëvitur flamuj sirianë.
Pas gjashtë dekadave diktaturë, gjatë së cilës u vranë 1 milion njerëz dhe u torturuan qindra mijëra të tjerë, “Siria po e rifiton vendin e saj të drejtë në mesin e kombeve të botës” – tha Al-Sharaa para udhëheqësve botërorë, raporton agjencia e lajmeve “Associated Press”.
Al-Sharaa u bë kreu i parë sirian që foli në Kombet e Bashkuara që nga viti 1967, kur Noureddine Attasi e kishte bërë të njëjtën gjë pak pas Luftës Arabo-izraelite, gjatë së cilës Siria e kishte humbur kontrollin e Rrafshnaltës së Golanit. Izraeli e aneksoi atë pjesë në vitin 1981.
Presidenti sirian e kritikoi Izraelin në fjalimin e tij, duke thënë se vendi fqinj nuk i ndali kërcënimet ndaj Sirisë që nga rënia e Assadit, duke shtuar se politikat izraelite “bien ndesh me pëkrahjen e komunitetit ndërkombëtar ndaj Sirisë dhe popullit të saj” dhe e rrezikojnë rajonin.
Më tej, ai u bëri thirrje shteteve perëndimore që t’ia heqin Sirisë sanksionet e periudhës së Assadit “në mënyrë që ato të mos jenë mjet për ta mbajtur në pranga popullin sirian”.
Duke folur para gazetarëve jashtë ndërtesës së OKB-së pas mbajtjes së fjalimit, Al-Sharaa tha se shpreson që sanksionet ndaj vendit të tij në fund do të hiqen.
“Siria nuk ia dëshiron askujt dhimbjen nëpër të cilën ka kaluar” dhe e ndien “vuajtjen e lufts dhe të shkatërrimit” – tha Al-Sharra, duke shprehur mbështetje për palestinezët në Gaza, ku lufta mes Izraelit e Hamasit po vazhdon ende.
Sinjali – aty ku e vërteta flet para lajmit!