Biografitë zyrtare nuk e tregojnë gjithmonë të gjithë historinë. Ndonjëherë, fijet e kujtesës ndërthuren në mënyra të papritura, duke zbuluar origjina të harruara, identitete të fshehura dhe shtigje që askush nuk mund t’i kishte imagjinuar.
Ky duket të jetë rasti i Papës së ri, figurë që për vite me radhë është paraqitur me një profil të qartë dhe të pandryshuar: amerikan, me rrënjë të thella në kulturën dhe strukturën e Kishës në Shtetet e Bashkuara.
Por në javët e fundit, një sërë zbulimesh të papritura kanë nisur të trazojnë këtë narrativë të përkryer. Fillimisht ishin thjesht thashetheme në rrjete sociale, pastaj hipoteza në forume genealogjike. Tani, është kthyer në një çështje serioze me përmasa ndërkombëtare.
Një investigim i thellë, i zhvilluar në mënyrë të pavarur nga hulumtues në SHBA, Francë dhe Itali, ka sjellë në dritë një emër që nuk figuron në asnjë biografi zyrtare: Giovanni Riggitano.
Sipas dokumenteve të gjetura në arkivat e emigracionit dhe burimeve kishtare të fund shekullit XIX dhe fillimit të shekullit XX, Giovanni Riggitano ka qenë një burrë i lindur në qytetin bregdetar të Milazzo-s, në Siçilinë jugore. Ai do të ishte gjyshi biologjik i Papës së tanishëm.
Në moshë të re, Giovanni kishte lënë Italinë, si shumë të tjerë në atë kohë, në kërkim të një jete më të mirë përtej Atlantikut. Sapo mbërriti në SHBA, ai ndërroi identitet. U bë John Prevost, një emër që tingëllonte më “i pranueshëm” në realitetin e ri amerikan. Filloi të punonte si mësues i frëngjishtes dhe më vonë lidhi jetën me një grua franceze të quajtur Suzanne Fontaine. Nga kjo lidhje lindi babai i Papës së tanishëm.
Nëse këto të dhëna konfirmohen – dhe dokumentet që qarkullojnë online janë gjithnjë e më bindëse – atëherë do të kemi të bëjmë me një rishkrim të plotë të gjenealogjisë së Atit të Shenjtë.
Papa Prevost, për të cilin besohej se kishte rrënjë tërësisht amerikane, në të vërtetë ka një histori që nis në brigjet e Sicilisë, kalon nëpër Francë dhe vendoset në Shtetet e Bashkuara, për t’u rikthyer simbolikisht tani, në Vatikan.
Një video që filloi të qarkullojë në internet ishte pika e kthesës në këtë histori. E publikuar fillimisht nga një përdorues italian, videoja përmbante të dhëna vizuale nga librat e vjetër të regjistrit civil në Milazzo dhe përkonte me emrin e Giovanni Riggitano-s dhe datën e tij të lindjes.
Pas kësaj, hulumtues të pavarur e morën çështjen seriozisht. Gërmuan në arkiva kishtare, në listat e anijeve që mbërritnin në Portin e Nju Jorkut dhe në të dhëna të censit amerikan të fillim shekullit XX. Pjesët u bashkuan si në një mozaik që tani po merr formë.
Në këtë moment, Selia e Shenjtë nuk ka dhënë asnjë koment zyrtar, por burime pranë qarqeve kishtare kanë pranuar në mënyrë joformale se “ka nisur një proces verifikimi i brendshëm” për të qartësuar nëse informacionet janë të sakta. Reagimet kanë qenë të ndara.
Disa e kanë pritur me entuziazëm këtë lidhje të re kulturore që përforcon dimensionin universal të Papës, të tjerë pyesin pse kjo pjesë e historisë së tij është mbajtur e fshehtë deri më tani.
Për shumë njerëz, ky zbulim nuk ndryshon asgjë thelbësore. Papa mbetet Papa, pavarësisht mbiemrit të gjyshit. Por për ata që kërkojnë të kuptojnë jo vetëm figurën, por edhe formimin dhe thellësinë kulturore të liderit shpirtëror të më shumë se një miliard besimtarëve, kjo është një copëz e rëndësishme e mozaikut.
Një gjë është e sigurt: historia e Papës së ri nuk është më ajo që besohej. Ajo fillon në një qytet të vogël të Siçilisë dhe, përmes një udhëtimi të heshtur dhe një emri të ndërruar, arrin deri në majën e Kishës Katolike.
Sinjali – aty ku e vërteta flet para lajmit!
