Evakuimi i qytetarëve të Maqedonisë së Veriut nga Lindja e Mesmepritet të fillojë të dielën dhe do të realizohet me fluturime çarter komerciale.
Sipas njoftimit të Ministria e Punëve të Jashtme dhe Tregtisë së Jashtme e Maqedonisë së Veriut, fluturimet do të organizohen pasi institucioni të ketë lidhur marrëveshje me një linjë ajrore përmes një procedure të zhvilluar në përputhje me Ligjin për Prokurimin Publik.
Sipas dinamikës së planifikuar, pritet që të gjithë qytetarët maqedonas që kanë shprehur gatishmërinë për evakuim të kthehen më së voni deri në mesin e javës së ardhshme.
Procesi, siç bëhet e ditur, po koordinohet përmes misioneve diplomatike dhe konsullore në rajon, ndërsa detajet teknike dhe organizative të fluturimeve do të përcaktohen më tej me operatorin ekonomik. Pas kësaj, qytetarët do të informohen në kohën e duhur.
Ndërkohë, përmes kanaleve diplomatike po mblidhen aplikimet dhe po bëhet evidentimi i numrit të qytetarëve të interesuar për evakuim.
Deri më sot, Ambasada në Doha ka kontaktuar 150 qytetarë maqedonas, nga të cilët 95 kanë shprehur gatishmërinë për evakuim.
Ndërkaq, Ambasada në Abu Dhabi ka kontaktuar 585 persona që banojnë në Emiratet e Bashkuara Arabe, si dhe 36 persona nga Kuvajti, 15 nga Bahreini dhe 5 nga Mbretëria e Arabisë Saudite.
Ministria u ka bërë thirrje edhe një herë të gjithë qytetarëve që ende nuk kanë kontaktuar përfaqësitë diplomatike dhe konsullore dhe që kanë nevojë për evakuim ose ndihmë, ta bëjnë këtë sa më shpejt përmes numrave të telefonit, duke i dhënë përparësi kthimit të sigurt dhe në kohë.
Sinjali – aty ku e vërteta flet para lajmit!
