Ndeshja mes Schalke 04 dhe Arminia Bielefeld ka sjellë një skenë të pazakontë, por gjithnjë e më të zakonshme në futbollin evropian – një pushim të shkurtër gjatë takimit, në mënyrë që lojtarët që agjëronin gjatë muajit të Ramazanit të mund të ndërprisnin agjërimin e tyre.
Muaji i shenjtë për myslimanët, Ramazani, ka filluar më 18 shkurt dhe përbën një sfidë të veçantë për sportistët profesionistë. Edhe pse Islami u lejon atyre të kompensojnë më vonë ditët e agjërimit të humbura, vendimi për të agjëruar mbetet personal.
Në radhët e Schalkes, gjashtë futbollistë janë duke agjëruar: trajneri Miron Muslic dhe lojtarët Hasan Kurucay, Moussa Sylla, Adil Aouchiche, Zaid Tchibara, Kenan Karaman dhe Moussa Ndiaye.
Në ndeshjen në shtëpi kundër Bielefeldit, katër prej tyre ishin në formacionin titullar. Gjatë lojës, gjyqtari Tobias Reichel e ndërpreu ndeshjen në minutën e 23-të, në mënyrë që lojtarët të mund të merrnin ushqim dhe pije pas perëndimit të diellit.
Kjo praktikë është e pranishme në ndeshjet e Bundesligës që nga viti 2022 dhe zakonisht klubet bien dakord për të në mënyrë joformale para fillimit të takimit.
Trajneri i Schalkes e ka falënderuar kundërshtarin për mirëkuptimin dhe ka theksuar se agjërimi mbetet një sfidë shtesë për ekipin.
“Një falënderim i madh për Arminia Bielefeld që tha menjëherë ‘po’ kur erdhi koha për pushimin. Kemi gjashtë lojtarë që po agjërojnë. Është një sfidë, por është një vendim i zemrës”, ka thënë Muslic para fillimit të ndeshjes.
Ai dhe lojtarët e tij nuk hanë e as nuk pinë gjatë ditës deri në perëndim të diellit, ndërsa koha e agjërimit përcaktohet nga lindja dhe perëndimi i diellit.
Schalke është ndihmuar nga oraret e vona të ndeshjeve deri më tani, pasi kanë luajtur kundër Magdeburgut dhe Furthit në orën 20:30, pra pas perëndimit të diellit. Megjithatë, ndeshja e radhës paraqet një sfidë të re – Schalke luan kundër Hannoverit në orën 13:30 të dielën, çka do të thotë se lojtarët që agjërojnë do ta kalojnë gjithë ndeshjen pa ngrënë dhe pa pirë.
Sinjali – aty ku e vërteta flet para lajmit!
