Në shkollën fillore dhe të mesme të ulët “Zahir Pajaziti” në Orllan, një institucion me histori që nga viti 1961, është bërë një hap i rëndësishëm për komunitetin dhe arsimin lokal: brenda ambientit të shkollës është vendosur çerdhja për fëmijët nga mosha 1 deri në 5 vjeç.
Ky investim i komunës ka për qëllim lehtësimin e jetës së familjeve të fëmijëve të moshave të vogla, duke i ofruar mundësi për kujdes afër shtëpisë dhe pa nevojën për të udhëtuar në vende të tjera.
Ndërtimi i çerdhes në aneksin e shkollës “Zahir Pajaziti” është një përparim i dukshëm në ofrimin e shërbimeve arsimore dhe sociale në këtë zonë.
Drejtori i shkollës, Naim Bajrami, tregon për Telegrafin zhvillimet që po realizohen me përkushtim.
“Përveç kabineteve të fizikës, kimisë, biologjisë, arkivit të shkollës, muzikës, muzeut dhe kabinetit të Teknologjisë së Informacionit dhe Komunikimit, risia më e madhe është ndërtimi i çerdhes në aneksin e shkollës ‘Zahir Pajaziti’. Ky investim është një ndihmesë e madhe për familjet e fëmijëve të moshës 1-5 vjeç, të cilët tashmë kanë mundësi të marrin kujdesin e duhur brenda komunitetit tonë”, shprehet ai.
Përveç çerdhes, janë bërë edhe përmirësime të tjera në ambientet shkollore, si rrethojat e reja dhe krijimi i klasave verore, duke përmirësuar cilësinë dhe mundësitë e mësimdhënies.
Në hapësirat e shkollës ndodhen gjithashtu fotografi dhe simbole që nderojnë heroin kombëtar Zahir Pajaziti, duke ruajtur lidhjen e fortë midis arsimit dhe historisë së kombit.
Drejtori Bajrami thekson se gjatë mandatit të tij të dytë do të vijojnë përpjekjet për ngritjen e cilësisë së arsimit, që tashmë është në një nivel shumë të kënaqshëm.
Në kuadër të këtij institucioni veprojnë edhe degë në fshatrat përreth, duke shërbyer qindra nxënës të komunitetit. /Telegrafi/