Ndërron jetë elektricisti Arjan Kraja, heroi që shpëtoi dy fëmijë në Velipojë
Pas tre muajsh në koma ka ndërruar jetë Arjan Kraja, punonjësi i OSSH-së që shpëtoi nga mbytja dy fëmijë të mitur në Velipojë. Ai pësoi një ishemi pas aktit heroik dhe që prej asaj dite ndodhej në gjendje kome.
Lajmi i hidhur është konfirmuar nga Operator i Sistemit të Shpërndarjes së Energjisë ), ku Kraja punonte prej vitesh si shef grupi.
“Me keqardhje të thellë Ekipi i Operatorit të Sistemit të Shpërndarjes OSSH ka marrë lajmin për ndarjen nga jeta të kolegut të dashur, Arjan Kraja. Gjatë viteve të tij në detyrë si shef grup, Arjani u dallua për përkushtimin profesional, ndershmërinë në punë, si dhe mirësinë e tij njerëzore, që e bënte të respektuar e të dashur nga të gjithë kolegët”, thuhet në reagimin e OSSH-së.
Në përfundim të reagimit, OSSH u shpreh ngushëllimet më të sinqerta familjes, të afërmve dhe miqve të tij.
Arjan Kraja ishte në koma prej tre muajsh, pasi kishte hyrë në det në plazhin e Velipojës për të shpëtuar dy fëmijë që po rrezikonin të mbyteshin.
Ai arriti të shpëtonte jetët e tyre, por vetë përfundoi në gjendje të rëndë shëndetësore, duke mos arritur të rikuperohej.