Aeroporti gjerman në Mynih ka anuluar mbi një duzinë fluturimesh pasi disa dronë janë parë pranë hapësirës ajrore. Të paktën 17 fluturime janë ulur në Mynih, duke ndikuar në pothuajse 3000 pasagjerë.
Aeroporti në Mynih njoftoi se ka devijuar edhe 15 aeroplanë të tjerë në qytete të afërta. Nuk ka pasur konfirmim të menjëhershëm për origjinën e dronëve. Disa aeroporte në të gjithë Evropën janë mbyllur javët e fundit për shkak të dronëve të paidentifikuar, duke ndikuar edhe në pezullimin e fluturimeve.
Kontrolli ajror ka devijuar fluturimet që ishin parashikuar të uleshin në Mynih në Stuttgart, Nuremberg, Vjenë dhe Frankfurt.
Për shkak të errësirës, nuk është konfirmuar lloji, madhësia apo origjina e dronëve, tha zëdhënësi i policisë federale, Stefan Bayer, për gazetën Bild. Dronët janë parë për herë të parë në orën 21:30 sipas kohës lokale, dhe më pas sërish një orë më vonë, njoftoi policia.
CNN ka kontaktuar policinë shtetërore të Bavarisë dhe policinë federale gjermane. Vëzhgimet e fundit të dronëve në të gjithë Bashkimin Evropian kanë nxitur mbajtjen e një samiti të liderëve në Kopenhagë.
Njëzet dronë rusë kanë kaluar në Poloni, ndërsa aeroplanë rusë MiG-31 kanë hyrë në hapësirën ajrore të Estonisë në incidente të ndara kohët e fundit.
Aeroportet në Kopenhagë dhe Oslo janë detyruar të mbyllen pasi dronë të paidentifikuar janë parë pranë aeroporteve dhe hapësirave ajrore ushtarake.
Rusia ka mohuar çdo përfshirje, ndërsa autoritetet daneze thonë se nuk ka prova që Moska të jetë përfshirë.
Aktualisht, qyteti është mikpritës i festivalit vjetor Oktoberfest, i cili pritet të përfundojë më 5 tetor. Festivali tërheq mbi gjashtë milionë njerëz çdo vit, sipas faqes zyrtare të internetit. /Telegrafi/