23:28 / E Hënë, 05 Maj 2025 / Gj. Sh
Luka Modrić ende nuk ka qartësi për të ardhmen e tij te Real Madrid pas përfundimit të kontratës aktuale në fund të qershorit. Mesfushori kroat, i cili mbush 40 vjeç në shtator, është i hapur për të vazhduar edhe një sezon tjetër në kryeqytetin spanjoll.
Modrić është bërë simbol i politikës së klubit për rinovimet njëvjeçare për lojtarët mbi 30 vjeç, duke nënshkruar rregullisht marrëveshje të tilla vit pas viti. Situata dukej se po drejtohej drejt një ndryshimi për sezonin 2025/26, me largimin e mundshëm të trajnerit Carlo Ancelotti, gjë që ka ndalur përkohësisht çdo vendimmarrje derisa të caktohet pasuesi i tij. Xabi Alonso është kandidati kryesor dhe pritet të flasë personalisht me Modrić përpara çdo vendimi.
Për momentin, është arritur një marrëveshje e përkohshme për të mbuluar periudhën e FIFA Club Ëorld Cup që zhvillohet deri në mesin e korrikut. Modrić dhe Lucas Vázquez kanë rënë dakord për një mini-rinovim që do t’i mbajë në skuadër deri në fund të turneut. Real Madrid synon të shkojë sa më larg në këtë kompeticion të riformatuar, për të përfituar nga shpërblimet e mëdha financiare që ofrohen për skuadrat që kalojnë fazat e fundit.
Sipas “Relevo”, Modrić është i kënaqur me këtë zgjidhje për momentin, por nuk ka marrë ende asnjë informacion konkret nga klubi për sezonin e ardhshëm. Ai mbetet i gatshëm të vazhdojë me ulje të rrogës, siç ka bërë vitet e fundit, me synimin për të qëndruar në nivel të lartë dhe për të udhëhequr Kroacinë në Kupën e Botës 2026 që do të mbahet në SHBA, Kanada dhe Meksikë.
