Mbi 500 mijë euro i ka kushtuar Ministrisë së Shëndetësisë specializimi i rreth 50 farmacistëve.
Saktësisht, shteti i Kosovës ka financuar specializimin për 15 toksikologë, 25 farmacistë klinikë dhe 8 farmacistë të hulumtimit dhe kontrollit të barnave, raporton Kiks Kosova.
Megjithatë, harxhimi i mbi gjysmë milioni euro po vlerësohet se është bërë pa asnjë strategji nga Ministria e Shëndetësisë.
Zëvendëskryetari i Odës së Farmacistëve, Astrit Haxhijaha, tha për Kiks Kosovën se nga 15 toksikologët e specializuar dhe të licencuar, vetëm 4 prej tyre janë të punësuar si toksikologë.
Gjendja e njëjta ai thotë se është edhe me farmacistët klinikë e edhe ata të hulumtimit dhe kontrollit të barnave.
Papunësia e specializantëve, shkollimi i të cilëve u financua nga shteti, nuk qe mësim për Ministrinë e Shëndetësisë.
Kësisoj, më 19 dhjetor të 2024-ës, kjo ministri shpalli konkursin për shkollim specialistik.
Në konkursin që mban nënshkrimin e ministrit në detyrë, Arben Vitia, janë 4 vende për farmacistë, 2 për specializim të Farmacisë Klinike dhe 2 të Toksikologjisë Klinike.
Në arsyetim të këtij vendimi thuhet se ka kërkesa të institucioneve, nevoja objektive, si dhe kapacitete mentoriale e infrastrukturore për këto dy profesione. /Klankosova.tv
The post Mbi gjysmë milioni i shkuar kot, MSh-ja specializon farmacistë e nuk ua gjen punën (VIDEO) appeared first on Klan Kosova.
