Ky ushtrim i lashtë nga Kina, i quajtur edhe “meditim në lëvizje”, forcon trupin, përmirëson ekuilibrin, ul stresin dhe mbron kujtesën – pa rrezikun e lëndimeve
Ekspertët e shëndetit theksojnë se kjo praktikë mund të jetë mënyra më e mirë që të moshuarit të përmbushin nevojat e përditshme për aktivitet fizik. Dr. Peter Wayne, profesor në Harvard dhe specialist i tai chi-t, thekson se kjo është një nga aktivitetet më efikase për këtë grupmoshë.
Rekomandimet për ushtrime
Rekomandohet që të rriturit, përfshirë edhe ata mbi 65 vjeç, të ushtrohen të paktën 150 minuta në javë me intensitet të moderuar ose 75 minuta me intensitet të lartë. Me kalimin e moshës, trupi e përballon më vështirë lodhjen, dhe aktiviteti fizik mund të bëhet sfidues. Tai chi është zgjidhja – i butë, por njëkohësisht mjaftueshëm efektiv për të mbështetur shëndetin, transmeton Telegrafi.
Meditim në lëvizje
Tai chi shpesh quhet meditim në lëvizje. Është një formë e lehtë ushtrimi që u përshtatet edhe atyre me lëvizshmëri të kufizuar. I lindur në Kinë para shumë shekujsh, sot është një formë aktiviteti e arritshme dhe e sigurt. Për shkak të lëvizjeve të ngadalta dhe të kontrolluara, rreziku i lëndimeve është minimal, çka e bën ideal për të moshuarit.
Përfitimet shëndetësore të tai chi-t
Sipas Dr. Wayne, tai chi vepron si një “ilaç për shumë probleme”. Ushtrimi i rregullt ndihmon në forcimin dhe ruajtjen e fleksibilitetit, përmirëson ekuilibrin dhe frymëmarrjen, nxit relaksimin dhe ul nivelin e stresit. Gjithashtu, ndikon pozitivisht në përqendrim dhe kujtesë, ndërsa aspekti social i ushtrimeve në grup motivon dhe ofron mbështetje shtesë.
Tai chi është një mënyrë e thjeshtë, e sigurt dhe e këndshme që të moshuarit të ruajnë shëndetin dhe cilësinë e jetës. Në kombinim me ushqyerjen e shëndetshme, ai mund të kontribuojë ndjeshëm në vitalitetin dhe formën e mirë fizike në moshë të shtyrë.
Dr. Robert Wermers, endokrinolog në Mayo Clinic, thotë se tai chi është një ushtrim me intensitet të ulët që ndihmon në ekuilibër, mund të reduktojë rëniet dhe të parandalojë frakturat e kockave që dëmtojnë cilësinë e jetës tek të moshuarit.
– YouTube www.youtube.com
/Telegrafi/