Dasma e shumëpritur e Selena Gomez dhe producentit Benny Blanco ka bërë bujë në botën e showbiz-it, duke u komentuar si një nga ceremonitë më madhështore të vitit.
Çifti, pas një fejesë të shkurtër, kurorëzoi dashurinë e tyre në një pronë private prej 70 akrash në veri të Santa Barbarës, ku u mblodhën rreth 170 të ftuar, mes tyre emra të njohur si Taylor Swift, Martin Short, Steve Martin, Paris Hilton dhe Ed Sheeran.
Atmosfera e dasmës u përshkua nga një elegancë romantike: Selena u shfaq e mrekullueshme me një fustan të bardhë pa shpinë, të zbukuruar me detaje të rafinuara, ndërsa Benny zgjodhi një kostum klasik të zi nga Ralph Lauren, shkruan DailyMail.
Fotografitë e publikuara treguan çiftin duke ndarë momente intime, shëtitje zbathur në fushë dhe përqafime plot dashuri, duke dhënë ndjesinë e një përralle moderne.
Siguria në vendin e ngjarjes ishte e nivelit më të lartë, me Gomez që thuhet se shpenzoi mbi 300 mijë dollarë (rreth 279 mijë euro) për të ruajtur privatësinë e ceremonisë.
Tenda të mëdha, dekorime me lule dhe drita të buta krijuan një ambient magjik për shkëmbimin e unazave, ndërsa të ftuarit e profilit të lartë u mbrojtën nga paparacët me çadra të mëdha gjatë hyrjes në event.
Ky kapitull i ri në jetën e Selenës vjen pas një historie të ndërlikuar dashurie me ish-partnerin e saj Justin Bieber, të cilën ajo vetë e ka përshkruar si “toksike”.
Me Bennyn, marrëdhënia ka marrë një kthesë të qetë dhe të balancuar, duke filluar si bashkëpunim artistik dhe duke u shndërruar në një romancë të sinqertë që kulmoi në martesë.
Dasma e Selenës dhe Bennyt u shndërrua në një moment të paharrueshëm jo vetëm për çiftin, por edhe për publikun që e ka ndjekur nga afër historinë e saj.
Ajo shënon një fillim të ri për këngëtaren dhe aktoren e dashur, duke vulosur dashurinë e saj në një event ku shkëlqeu arti, eleganca dhe emocionet e vërteta. /Telegrafi/
