Një skuadron i avionëve luftarakë amerikanë F-15, i vendosur në Jordani dy javë më parë, është tashmë në gatishmëri të plotë për të ndërhyrë dhe kapur dronët iranianë që po i drejtohen Izraelit, raportoi gazeta izraelite Haaretz, shkruan Gazeta Sinjali.
Ky vendim i Shteteve të Bashkuara erdhi si pjesë e një përpjekjeje për të parandaluar përshkallëzimin e konfliktit mes Izraelit dhe Iranit, pas paralajmërimeve për një hakmarrje iraniane pas sulmeve izraelite ndaj objektivave strategjike në territorin iranian.
Sipas raportit, rreth 100 dronë iranianë janë aktualisht në fluturim drejt Izraelit. Skuadroni amerikan, i cili zakonisht është i vendosur në Mbretërinë e Bashkuar, është pajisur me municione të specializuara për të përballuar kërcënime ajrore, përfshirë dronët dhe raketat balistike me rreze të shkurtër.
Çdo avion F-15 i vendosur në këtë operacion është i pajisur me 21 interceptorë të vegjël, të aftë për të rrëzuar një duzinë dronësh në një mision të vetëm, duke e bërë këtë skuadron një element kyç në përpjekjet për mbrojtjen ajrore të Izraelit.
Sinjali – aty ku e vërteta flet para lajmit!
