Shtetet e Bashkuara kanë paralajmëruar qytetarët e tyre që ndodhen në Iran të largohen menjëherë nga vendi, për shkak të përshkallëzimit të protestave dhe pasigurisë së shtuar.
Në një njoftim të publikuar nga Virtual Embassy Tehran, e drejtuar nga Departamenti i Shtetit, thuhet: “Leave Iran now” (“Largohuni nga Irani tani”), duke i këshilluar amerikanët të planifikojnë largimin pa pritur ndihmë nga qeveria amerikane.
Alarmi i sigurisë paralajmëron për protesta të përshkallëzuara, dhunë të mundshme, arrestime, ndërprerje të internetit dhe masa të shtuara sigurie.
Autoritetet amerikane theksojnë se çdo lidhje e dukshme me SHBA mund të çojë në ndalime, pasi Irani nuk e njeh shtetësinë e dyfishtë dhe trajton qytetarët me shtetësi të dyfishtë SHBA-Iran vetëm si iranianë.
Qytetarët amerikanë janë këshilluar të largohen përmes rrugëve tokësore, përfshirë kufijtë me Armeninë ose Turqinë, nëse kjo është e sigurt. Ata që nuk mund të largohen janë udhëzuar të qëndrojnë në vende të sigurta, të shmangin demonstratat, të mbajnë profil të ulët dhe të sigurojnë rezerva ushqimore, ujë dhe medikamente.
Sinjali – aty ku e vërteta flet para lajmit!
