Kryeministri i Kosovës, Albin Kurti, e ka vlerësuar si zhvillim pozitiv vendimin e Komitetit të Rajoneve të Bashkimit Evropian për të hequr asteriskun dhe fusnotën nga përdorimi për Kosovën në dokumentet e tij zyrtare.
“Duket që sivjet pranvera po vjen më herët dhe, siç është thënë atëbotë, fusnota do të shkrihet si një fjollë bore. Ndoshta është gabuar viti dhe qeveria, por kjo po ndodh. Natyrisht që kemi ende trashëgimi të keqe nga ajo kohë dhe nuk duhet të entuziazmohemi tepër”, u shpreh Kurti para gazetarëve.
Ai theksoi se sfidat kryesore me të cilat është përballur gjatë negociatave në Bruksel lidhen pikërisht me trashëgiminë e proceseve të mëhershme.
“Po e ritheksoj që pengesat, problemet, sfidat, vështirësitë kryesore që i kam pasur gjatë negociatave në Bruksel vijnë pikërisht prej trashëgimisë së mbrapshtë që na e kanë lënë qeveritë pararendëse”, tha ai.
Kryeministri shtoi se aktualisht ekziston një atmosferë pozitive në Bruksel që Kosova të avancojë në rrugën e saj evropiane.
“Ne po punojmë me krejt çfarë dimë e mundemi me shumë zell, por edhe durim që ato të eliminohen dhe unë besoj që në Bruksel është atmosfera pozitive që Kosova të bëjë hapa përpara. E dy hapat më të rëndësishëm në vijim janë: pyetësori prej Komisionit Evropian dhe statusi i vendit kandidat”, nënvizoi Kurti.
Ai tha se aktualisht presidencën e Bashkimit Evropian e mban Qipro, kurse prej 1 korrikut fillon presidenca e Irlandës, teksa përmendi se këto ditë në Kosovë po qëndron ambasadori i Irlandës që e mbulon Kosovën nga Budapesti.
Sinjali – aty ku e vërteta flet para lajmit!
