Kryeministrja e Tajlandës, Paetongtarn Shinawatra, është shkarkuar nga detyra nga Gjykata Kushtetuese për shkelje të etikës, duke e zhytur vendin në një tjetër krizë politike.
Vendimi godet një prej dinastive më të fuqishme politike në Tajlandë dhe vjen pas një skandali të madh diplomatik.
Shkarkimi i saj u nxit nga publikimi i një telefonate në muajin qershor, ku ajo dëgjohej duke iu referuar ish-kryeministrit të Kamboxhias, Hun Sen, si “xhaxha”, ndërsa kritikonte hapur ushtrinë tajlandeze në një kohë tensionesh të larta me Kamboxhian, raporton BBC.
Telefonata u bë publike nga vetë Hun Sen dhe shkaktoi reagime të ashpra në Tajlandë. Kritikat ndaj Shinawatras u përqendruan te qëndrimi i saj ndaj ushtrisë, çka u interpretua si minimi i autoritetit të saj.
Me këtë zhvillim, Paetongtarn bëhet kryeministrja e pestë që largohet nga posti me vendim të Gjykatës Kushtetuese që nga viti 2008. Ajo është gjithashtu vajza e ish-kryeministrit të njohur Thaksin Shinawatra, figura që ka dominuar politikën tajlandeze për më shumë se dy dekada.
Sinjali – aty ku e vërteta flet para lajmit!