Kreu i PDK-së, Memli Krasniqi, ka reaguar pas mbylljes së seancës konstituive të Kuvendit, duke thënë se kryeparlamentari nuk ka kompetenca të vendosë për përfundimin e saj, pasi kjo është e rregulluar me Kushtetutë dhe Rregulloren e Punës.
Ai ka theksuar se Kuvendi nuk mund të konsiderohet i konstituar pa zgjedhjen e kryesisë.
“Tallja me Kuvendin dhe qytetarët nga VV po vazhdon. Përkundër që ne e mundësuam një proces që do zhbllokonte krizën politike, na nxirrte si institucione nga situata, VV nuk e ka këtë qëllim por që ta thellojë krizën. Nuk varet nga vullneti dhe interpretimi i kryetarit të Kuvendit se a përfundon a jo seanca konstituive, por kjo është e qartë sipas Kushtetutës dhe Rregullores së punës”, tha Krasniqi.
Ai ka treguar se kryeministri në detyrë, Albin Kurti, e ka ftuar në takim para seancës për të diskutuar rreth zgjedhjes së Nenad Rashiqit në postin e nënkryetarit të Kuvendit, por këtë ftesë nuk e ka pranuar.
“Kam refuzuar ta takojë Kurtin sot sepse nuk ka pasur arsye të takohemi ne të diskutojmë si me shkelë Kushtetutën. Kurti ka dashur që të takohet me insistim për të diskutuar si mund ta zgjedhim Rashqin nënkryetar. I njëjti që nuk ka qenë i gatshëm të takohet as 10 minuta për të diskutuar zgjedhjen e një kryetari të dinjitetshëm, një që s’është Dimal, që nuk i turpëron as ata vetë e as qytetarët”, deklaroi ai.
Krasniqi ka kritikuar edhe thirrjen e kryetarit të Kuvendit, Dimal Basha, për mbledhje të kryesisë ditën e hënë, duke e cilësuar arbitrare.
“Interpretimi arbitrar i Bashës nuk është e re, sepse Dehari interpretonte më herët. Këta janë vonuar 1 orë për ta filluar seancën, sepse po ma merr menja që instruksionet ia ka shkruar ose Albulena Haxhiu ose eksperti i drejtësisë Hekuran Murati se me ata dy erdh në seancë. Janë duke sharruar edhe më thellë në shkelje kushtetuese”, ka shtuar ai.
Sinjali – aty ku e vërteta flet para lajmit!