Konflikti në Lindjen e Mesme ka hyrë në ditën e 693-të dhe situata po përshkallëzohet me zhvillime të reja që kanë tronditur opinionin ndërkombëtar.
Sipas mediave lokale dhe raportimeve të portalit izraelit Ynet, një sulm ajror i dyshuar izraelit ka goditur një banesë në Sana’a, kryeqytetin e Jemenit, duke vrarë Ahmed Ghaleb Al-Rahwi, kryeministrin e qeverisë së rebelëve Huthi. Sulmi, që besohet se kishte në shënjestër drejtues të lartë të kësaj lëvizjeje, ndodhi në një zonë të banuar të qytetit.
Lajmi u raportua fillimisht nga gazeta jemenase Aden Al-Rad, duke cituar burime të afërta me ngjarjen. Ende nuk ka një konfirmim zyrtar nga qeveria izraelite apo nga zyrtarë të lëvizjes Huthi.
Në Izrael, tensionet janë gjithashtu në rritje. Familjet e pengjeve që mbahen në Rripin e Gazës kanë paralajmëruar një protestë masive më 3 shtator përpara rezidencës së kryeministrit Benjamin Netanyahu. Ato kërkojnë një marrëveshje të menjëhershme për lirimin e të afërmve të tyre.
Ndërkohë, ministri i Sigurisë Kombëtare, Itamar Ben Gvir, është shprehur kundër këtyre protestave, duke sugjeruar ndalimin e tyre në hapësira publike dhe sinagoga. Në një deklaratë tjetër, Ministri i Jashtëm izraelit, Gideon Saar, ka theksuar se nuk ekziston asnjë plan për krijimin e një shteti palestinez.
Nga ana tjetër, BE-ja po përballet me presion të shtuar nga disa shtete anëtare. Suedia dhe Holanda i janë drejtuar Përfaqësueses së Lartë të BE-së, Kaja Kallas, me një letër ku kërkohet që Bashkimi Evropian të ndërmarrë masa konkrete ndaj Izraelit për shkelje të të drejtave të njeriut.
Situata në rajon vazhdon të jetë e paqëndrueshme, ndërsa përplasjet po zgjerojnë hartën e konfliktit përtej Gazës, përfshirë Jemenin dhe zona të tjera në Lindjen e Mesme.
Sinjali – aty ku e vërteta flet para lajmit!