Komiteti i Përbashkët për Çështjet e Bashkimit Evropian i Kuvendit të Irlandës do të mblidhet të mërkurën, më 25 mars, për të zhvilluar një diskutim me ambasadorët e Kosovës dhe të Ukrainës në Irlandë, në kuadër të shqyrtimit të vazhdueshëm të procesit të zgjerimit të Bashkimit Evropian.
Takimi, sipas njoftimit, do të mbahet në sallën e komisioneve në Parlamentin e Irlandës.
Sipas njoftimit, në këtë mbledhje pritet të marrin pjesë Shkëlqesia e Tij, Ilir Kapiti, Ambasador i Republikës së Kosovës në Mbretërinë e Bashkuar të Britanisë së Madhe, që përfshin edhe Irlandën, dhe Larysa Gerasko, Ambasadore e Ukrainës në Irlandë.
Kryetari i Komitetit, deputeti irlandez Barry Ward, duke folur para takimit, theksoi rëndësinë e dëgjimit të drejtpërdrejtë nga përfaqësuesit diplomatikë të dy vendeve.
“Ne e mirëpresim mundësinë për të dëgjuar nga ambasadorët e Ukrainës dhe Kosovës, të cilët secili do të ofrojë një përditësim mbi progresin e vendeve të tyre drejt anëtarësimit në Bashkimin Evropian, përpjekjet e vazhdueshme për reforma, si dhe kontekstin më të gjerë gjeopolitik që po ndikon në politikën e zgjerimit”, deklaroi Ward.
Ai vuri theksin edhe te përvoja e Irlandës, duke e lidhur atë me rëndësinë e integrimit evropian për vendet aspiruese si Kosova.
“Përvoja e vetë Irlandës tregon se si integrimi evropian mund të sjellë paqe, të transformojë ekonomitë, të forcojë institucionet demokratike dhe të sigurojë stabilitet dhe prosperitet afatgjatë. Zgjerimi është pa dyshim i mirë për Evropën në tërësi, për shtetet anëtare individuale dhe për vendet që synojnë anëtarësimin”, u shpreh ai.
Ward theksoi se zgjerimi i BE-së mbetet një nga instrumentet më të rëndësishme strategjike të Unionit, sidomos në kohë pasigurie gjeopolitike.
“Në një kohë të pasigurive të mëdha gjeopolitike, është thelbësore që Irlanda dhe Bashkimi Evropian në tërësi të qëndrojnë pranë vendeve kandidate dhe aplikuese, duke mbështetur përpjekjet e tyre për reforma dhe progresin drejt anëtarësimit”, tha ai.
Sipas tij, ambasadorët pritet të raportojnë mbi përparimin në fusha kyçe si sundimi i ligjit, administrata publike dhe qeverisja ekonomike, si dhe përafrimi i vendeve të tyre me standardet dhe politikat e Bashkimit Evropian.
Ai shtoi se, pavarësisht luftës, Ukraina ka vazhduar me reformat e nevojshme për anëtarësim dhe me harmonizimin e legjislacionit me acquis communautaire të BE-së.
Në fund, Ward theksoi rolin që Irlanda mund të luajë në këtë proces, veçanërisht në prag të Presidencës së ardhshme të BE-së.
“Ne presim me interes të diskutojmë rolin që Irlanda mund të luajë, veçanërisht para Presidencës së saj të ardhshme në BE, në promovimin e një procesi të besueshëm dhe të bazuar në meritë për zgjerimin”, përfundoi kryetari i Komitetit të Përbashkët për Çështjet e Bashkimit Evropian, deputeti Barry Ward. /Klankosova.tv
