Kancelari gjerman, Friedrich Merz, paralajmëroi më 29 gusht se lufta e Rusisë në Ukrainë mund të zgjasë për “muaj të tërë”, pavarësisht përpjekjeve të fundit ndërkombëtare për t’i dhënë fund konfliktit, të udhëhequra nga Shtetet e Bashkuara.
Duke folur në Francë, bashkë me presidentin francez, Emmanuel Macron, Merz theksoi se nuk ka “iluzione” për një përfundim të shpejtë të luftës dhe u zotua se “ne nuk do ta braktisim Ukrainën”.
Ai gjithashtu komentoi vonesat e vazhdueshme të Kremlinit lidhur me përpjekjen e presidentit amerikan, Donald Trump, për të organizuar bisedime direkte mes presidentit rus, Vladimir Putin, dhe homologut ukrainas, Volodymyr Zelensky.
“Ajo është pjesë e strategjisë së këtij presidenti rus”, tha Merz.
Ai shtoi se më herët gjatë kësaj jave u bë e qartë se presidenti Putin nuk është i gatshëm të takohet me presidentin Zelensky dhe ka vendosur kushte paraprake që janë “krejtësisht të papranueshme”.
Merz theksoi gjithashtu rëndësinë e mbajtjes së aleatëve të Ukrainës të bashkuar brenda ashtuquajturit “koalicion të vullnetit”, duke e cilësuar këtë si “një nga detyrat tona më urgjente”.
Sinjali – aty ku e vërteta flet para lajmit!