Kryeministrja italiane, Giorgia Meloni, në fjalimin në Asamblenë e Përgjithshme të OKB-së, paralajmëroi për rreziqet e thella të një bote gjithnjë e më të paqëndrueshme, duke thënë se “jetojmë në një periudhë historike të përshpejtuar dhe komplekse, plot mundësi, por edhe të mbushur me rreziqe, midis luftës dhe paqes”.
Meloni theksoi se në botë aktualisht ka 56 konflikte të vazhdueshme – shifra më e lartë që nga Lufta e Dytë Botërore – duke e krahasuar këtë realitet me idealet mbi të cilat u themelua OKB-ja.
“A ia kemi dalë mbanë? Përgjigja është në lajme dhe është e pamëshirshme,” tha ajo. “Paqja, dialogu dhe diplomacia nuk janë më në gjendje të bindin dhe të fitojnë”.
Duke cituar Papa Françeskun dhe konceptin e “luftës së tretë botërore të zhvilluar pjesë-pjesë”, Meloni përmendi veçanërisht konfliktet në Ukrainë dhe në Gaza.
Sa i përket luftës në Ukrainë, Meloni akuzoi Rusinë për shkelje të qartë të Kartës së OKB-së, duke thënë se Moska ka “shkaktuar një plagë të thellë në të drejtën ndërkombëtare” dhe nuk ka treguar asnjë gatishmëri për paqe.
Në lidhje me konfliktin Izrael–Palestinë, kryeministrja italiane ka kritikuar qasjen izraelite.
“Reagimi i Izraelit ka tejkaluar parimin e proporcionalitetit dhe ka shkelur normat humanitare, duke shkaktuar një masakër të civilëve”, tha Meloni, duke paralajmëruar se Italia do të mbështesë disa nga sanksionet e propozuara nga BE kundër Izraelit.
Ajo shtoi se “Izraeli duhet të shpëtojë nga kurthi i kësaj lufte – për popullin e vet, për demokracinë, për vlerat universale”, ndërsa nënvizoi nevojën për zgjidhje konkrete dhe të guximshme për ndërtimin e paqes.
“Paqja nuk ndërtohet vetëm me thirrje apo me shpallje ideologjike, por me durim, guxim dhe arsyeshmëri”, tha ajo.
Sinjali – aty ku e vërteta flet para lajmit!