Zyrtarë izraelitë kanë publikuar një hartë të rrezes së raketave iraniane, duke pretenduar se ato mund të “arrijnë” edhe deri në Evropë.
Rreziku i një lufte në Lindjen e Mesme ka marrë një kthesë shqetësuese. Ajo që nisi si sulme të SHBA-së dhe Izraelit ndaj Iranit është shndërruar në një nga krizat gjeopolitike më serioze të dekadave të fundit, me pasoja që tejkalojnë kufijtë e rajonit.
Zyrtarë izraelitë dhe perëndimorë kanë deklaruar se raketat balistike iraniane kanë kapacitet që të arrijnë objektiva jo vetëm në Lindjen e Mesme, por edhe thellë në Evropë.
Në një deklaratë, Ministria e Punëve të Jashtme e Izraelit paralajmëroi se aftësitë raketore të Iranit “shkërcejnë përtej Lindjes së Mesme” dhe e përshkruan regjimin në Teheran si një kërcënim në rritje për paqen botërore.
Në një grafik të publikuar nga Qendra për Studime Strategjike dhe Mbrojtje, është paraqitur një hartë me rreze të ndryshme goditjeje që shtrihen nga rreth 300 deri në rreth 2,500 kilometra, duke bërë që një pjesë e konsiderueshme e Evropës Juglindore të bjerë brenda potencialit të kërcënimit.
Më të rrezikshme konsiderohen raketat balistike me rreze të mesme dhe të gjatë, si Shahab-3 dhe Ghadr-110, të cilat sipas vlerësimeve mund të arrijnë deri në rreth 2,000 kilometra.
Sipas hartës, brenda këtij rreziku përfshihen kryeqytete si Athina, Sofja dhe Bukureshti, por edhe qytete të tjera të Ballkanit Perëndimor. Në rrezen më të gjerë teorike mund të përfshihen edhe kryeqytete si Budapesta, Vjena, Varshava dhe Bratislava, me kusht që distanca e konsideruar të jetë maksimale.
Megjithatë, analistë të pavarur paralajmërojnë se këto rreze janë teorike dhe nuk nënkuptojnë domosdoshmërisht se raketat do të godasin automatikisht këto destinacione, pasi aftësia operative varet nga faktorë si saktësia, pengesat e kontrollit ajror dhe kushtet taktike.
Sinjali – aty ku e vërteta flet para lajmit!
