Gazetarja Ardiana Thaçi-Mehmeti ka denoncuar në Policinë e Kosovës rastin e shpërndarjes së paligjshme të të dhënave të saj personale në një grup në rrjetin “Discord”, që numëron 70 mijë anëtarë.
Drejtorja Ekzekutive e Asociacionit të Gazetarëve të Kosovës, Getoarbë Mulliqi, së bashku me gazetaren Ardiana Thaçi-Mehmeti dhe përfaqësuesin ligjor të AGK-së, avokatin Yll Zekaj, e kanë paraqitur rastin në Drejtorinë për Hetimin e Krimeve Kibernetike në Policinë e Kosovës, transmeton Klankosova.tv.
Nga ana tjetër, Rrjeti i Grave Gazetare theksoi se beson që institucionet përgjegjëse do të veprojnë me urgjencë për të hetuar rastin, për të identifikuar dhe ndëshkuar përgjegjësit.
Ky është rasti i tretë i ngacmimit online të natyrës së njëjtë që gazetarja Thaçi-Mehmeti ka përjetuar në dy vitet e fundit.
