Presidenti i gjigantit turk, Fenerbahce, Ali Koç, foli publikisht për herë të parë rreth arsyeve të shkarkimit të Jose Mourinhos, i cili u largua nga klubi disa ditë më parë, një vit pasi mori drejtimin e ekipit nga Stambolli.
Pika e fundit ishte humbja e fundit ndaj Benficas që eliminoi Fenerin nga gara e fazës së grupeve të Ligës së Kampionëve.
“Futbolli sulmues nuk ishte i pranishëm sezonin e kaluar. Ne folëm për këtë dhe dukej se ramë dakord”, ka thënë fillimisht Koç për gazetën portugeze Record.
“Këtë sezon, pesë ndeshjet e para zyrtare pasqyruan të njëjtën mënyrë loje. Benfica mund të eliminojë këdo, por mënyra se si luajtëm më shqetësoi. Kjo është arsyeja pse ky vendim ishte i vështirë, por i domosdoshëm. Ishte pika e fundit”.
“Mourinho ishte një punëtor. Nuk kam ankesa kundër tij personalisht. Ishte një ndarje e hidhur, por marrëdhënia jonë mbetet miqësore”, përfundoi ai.
Edhe pse i kishte mbetur edhe një vit në kontratë, Fenerbahce vendosi t’ia ndërpresë kontratën. Sipas gazetarit turk Yagiz Sabuncuoglu, Mourinho do të marrë një kompensim prej rreth nëntë milionë eurosh nga klubi turk.
Kjo e rrit më tej shumën totale që portugezi fitoi vetëm nga shkarkimet gjatë karrierës së tij, tani kjo shifër rritet në rreth 110 milionë euro.
Mourinho është shumë përpara kolegëve të tij për sa i përket të ardhurave totale që nga shkarkimi i tij. Rivali i tij më i madh Antonio Conte fitoi rreth 43 milionë euro, duke përfshirë një pagesë prej 30.4 milionë eurosh nga Chelsea në vitin 2018. /Telegrafi/