Ish-asistenti i Real Madridit, David Bettoni, i cili punoi së bashku me Zinedine Zidane nga skuadra rezervë deri te tre tituj radhazi të Ligës së Kampionëve, foli për Eden Hazard dhe qasjen e klubit ndaj mirëqenies fizike të lojtarëve individualë.
Hazard u transferua me shumë bujë tek Real Madridi nga Chelsea, por belgu nuk i plotësoi asnjëherë pritshmëritë.
“Problemi ishte se vetëm një muaj pas bashkimit me Realin, ai pësoi një dëmtim serioz në kyçin e këmbës. Pas asaj, nuk arriti kurrë të rikuperohej plotësisht”.
“Por sa i përket talentit, ai ishte fenomenal, Zidane e dëshironte personalisht si zëvendësues të Ronaldos”.
Bettoni komentoi gjithashtu menaxhimin e mirëqenies së lojtarëve.
“Nuk mund të kontrollosh vërtet rutinat e tyre personale. Çfarë bënim ne ishte t’u jepnim lojtarëve informacion, në mënyrë që ata ta ndanin me trajnerët e tyre private, për t’u siguruar që trajnerët përshtateshin me programin aktual të stërvitjes së ekipit”.
“Për shembull, nëse një lojtar bënte punë fizike në mëngjes, ne u thonim që ta merrnin atë në konsideratë”, përfundoi ai./Telegrafi/