Presidentja e Kosovës Vjosa Osmani, sot do t’i drejtohet Gjykatës Kushtetuese në lidhje me çështjen e zgjedhjes së nënkryetarit nga radhët e komunitetit serb.
Kjo temë u diskutua sot edhe në emisionin e mëngjesit “Ora 7” në Klan Kosova.
Gazetari Arlind Imeri, tha se beson se zgjedhja e nënkryetarëve nga radhët e komuniteteve joshumicë duhet të kthehet në pikën zero.
Kjo pasi që sipas tij, kryetari i zgjedhur i Kuvendit, Dimal Basha, e ka shkelur Kushtetutën dhe rregullorën e Kuvendit.
“Patjetër që duhet të kthehet në pikën zero zgjedhja e nënkryetarëve nga radhët e komuniteteve. Kjo për arsye që fillimisht praktika parlamentare është për të mos i ndarë të dy pjesëtarët të serbëve dhe minoriteteve tjera”, tha Imeri.
Të premtene kaluar, Kushtetuesja e aprovoi kërkesën e dorëzuar nga Lista Serbe për vendosjen e një mase të përkohshme lidhur me zgjedhjen e nënkryetarit të Kuvendit nga komuniteti serb.
Kjo masë do të jetë në fuqi deri më 30 shtator 2025.
Sipas këtij aktvendimi, masa e përkohshme ka për qëllim të ndalojë rrjedhjen e afatit 30-ditor për konstituimin e Kuvendit, i përcaktuar në një nga aktgjykimet e mëhershme të Kushtetueses.
The post Imeri: Basha ka shkelur Kushtetutën – zgjedhja e nënkryetarëve të kthehet në pikën zero (VIDEO) appeared first on Klan Kosova.