Infeksioni me virusin HPV mund të shkaktojë ndryshime të dukshme në lëkurën gjenitale, por me zbulim të hershëm, trajtim të duhur dhe vaksinim – parandalimi është i mundur
Lythat gjenitale janë një pasojë e pakëndshme e infeksionit me HPV (Human Papilloma Virus). Ato përfaqësojnë një nga manifestimet më të shpeshta të këtij virusi. Te gratë, lythat shfaqen zakonisht në vulvë, vagjinë, në zonën mes vagjinës dhe anusit, por edhe në qafën e mitrës. Zakonisht duken si rritje të vogla me pamje të lulelakrës, por mund të jenë edhe të sheshta ose të bashkuara në grupe.
Infeksioni përhapet përmes kontaktit të drejtpërdrejtë lëkurë-më-lëkurë në zonën gjenitale, madje edhe pa penetrim seksual. Virusi nuk kalon përmes lëkurës së paprekur, por përmes mikro-lëndimeve që mund të ndodhin gjatë marrëdhënieve seksuale, depilimit ose rrojës. Studimet e fundit tregojnë se HPV mund të jetë i pranishëm edhe në ujin amniotik të grave shtatzëna dhe madje në spermatozoide, gjë që dëshmon aftësinë e tij për t’u transmetuar në mënyra të ndryshme.
Lythat shkaktohen kryesisht nga HPV tipet 6 dhe 11, që janë me rrezik të ulët onkogjen, pra nuk lidhen me kancerin, por me ndryshime beninje të lëkurës dhe mukozës. Ato janë zakonisht të dukshme dhe të lehta për t’u dalluar, ndaj mjekët theksojnë rëndësinë e zbulimit të hershëm, i cili ndihmon në parandalimin e përhapjes lokale, infektimit të partnerit dhe e bën trajtimin më të lehtë, transmeton Telegrafi.
Diagnoza zakonisht vendoset përmes ekzaminimit gjinekologjik, dhe në disa raste përmes kolposkopisë për vlerësim më të detajuar. Edhe pse ndonjëherë lythat mund të zhduken vetë, zakonisht kërkohet trajtim aktiv. Metodat më të përdorura janë heqja fizike e tyre (me laser, krioterapi apo elektrokoagulim) dhe përdorimi i kremrave imunostimulues si imiquimod. Në raste të përsëritura, mjeku mund të rekomandojë edhe ilaçe që forcojnë imunitetin dhe veprojnë kundër HPV-së.
Zgjedhja e trajtimit varet nga gjendja e sistemit imunitar, numri dhe vendndodhja e lythave, si dhe nëse pacientja është shtatzënë. Megjithatë, rikthimi i tyre është i zakonshëm, sidomos nëse imuniteti është i dobët ose nuk respektohen udhëzimet pas trajtimit.
Mbrojtja më e mirë është parandalimi: përdorimi i prezervativit ndihmon, por nuk ofron mbrojtje të plotë, pasi virusi mund të transmetohet përmes lëkurës së pambuluar. Kujdesi ndaj shëndetit të lëkurës intime dhe vaksinimi kundër HPV-së janë masat më të rëndësishme. Vaksina është falas për vajza dhe djem nga 9 deri në 19 vjeç, dhe rekomandohet edhe për moshat mbi 19 vjeç, në konsultim me mjekun.
Në përfundim, lythat gjenitale janë një shenjë paralajmëruese e infeksionit me HPV dhe kërkojnë kujdes mjekësor të menjëhershëm. Zbulimi i hershëm, trajtimi i duhur dhe imunizimi përmes vaksinës janë mënyrat më të sigurta për të mbrojtur shëndetin seksual dhe riprodhues. /Telegrafi/