Abit Hoxha, profesor nga instituti ADGER, ka thënë se duket që qëllimi i partisë së parë, LVV-së, ka qenë shtyrja e afateve sa më shumë që të jetë e mundshme.
Në këtë konstatim, ai vjen pas situatës së krijuar në Kuvendin e Kosovës, ku sot nuk u zgjodh nënkryetari nga pakica serbe.
Megjithëkëtë, kryetari i Kuvendit, Dimal Basha, e konsideroi të përmbyllur seancën konstituive.
Por, është Lista Serbe ajo që të shtunën (30 gusht) ka paraqitur ankesë në Gjykatën Kushtetuese kundër votimit ndaras për zgjedhjen e nënkryetarëve nga komunitetet pakicë gjatë seancës konstituive.
Profesori Hoxha është i mendimit se kjo situatë do të jetë problematike kur kihet parasysh ankesa e LS-së në Kushtetuese. Veprimi i LS-së, sipas tij, do ta bëjë edhe Presidenten Vjosa Osmani të hezitojë të japë mandatarin.
“Kushtetuesja do të marrë pak kohë, ndërsa presidentja do të hezitojë të japë mandatarin për shkak të rastit në Gjykatën Kushtetuese, dhe kjo si duket i shkon për shtati LVV-së që të shtyjë sa më shumë afatet, që si duket ka qenë qëllimi që nga fillimi”, deklaroi profesori Hoxha në Info Magazine në Klan Kosova.
Ai thotë qysh në dizajnimin e shtetit të Kosovës dhe Kushtetutës së saj, gjithmonë është menduar se duhet të ketë negociata para krijimit të institucioneve në mënyrë që funksionimi i tyre të jetë i duhuri.
“Rezultati i zgjedhjeve i dalë nga zgjedhjet e fundit, determinon që i pari i listës fillon me negociata dhe duhet të negociojë me tjerët, gjë që nuk është bërë deri më tani. Si rezultat i kësaj ka edhe probleme tjera, sikurse kjo e ndarjes së votimit të nënkryetarëve të Kuvendit. Këtu është bërë njëfarë keqpërdorimi i pozitës aty sepse është dashur të shkohet siç ka qenë praktika deri më tani që të zgjedhën të gjithë përnjëherë”, u shpreh Abit Hoxha, profesor nga instituti ADGER. /Klankosova.tv
The post Hoxha: Shtyrja e afateve duket se ka qenë qëllimi fillestar i LVV-së (VIDEO) appeared first on Klan Kosova.