Kapiteni i Anglisë, Harry Kane, ka hedhur poshtë spekulimet e fundit për një rikthim të mundshëm në Ligën Premier, duke theksuar se fokusi i tij është “plotësisht i përqendruar” te Bayern Munich dhe se është i hapur për të nënshkruar një kontratë të re me klubin gjerman.
32-vjeçari ka edhe dy vite të mbetura në marrëveshjen e tij aktuale, por si drejtuesit e Bayernit ashtu edhe vetë Kane kanë lënë të kuptohet se bisedimet për zgjatjen e kontratës mund të nisin së shpejti.
Klubi bavarez është i vendosur ta mbajë sulmuesin e tij lider edhe përtej vitit 2027.
Kane pranoi se dëshira për t’u rikthyer në Angli është zbehur, pasi ka përjetuar “sukses fantastik” që prej largimit nga Tottenham Hotspur. Ai ka shënuar 19 gola për klubin dhe kombëtaren gjatë këtij sezoni, duke kaluar shifrën e 100 golave me Bayernin në kohë rekord.
Sulmuesi anglez tha se titulli i Bundesligës që fitoi sezonin e kaluar e ka motivuar të synojë arritje edhe më të mëdha me klubin gjerman, ndërsa ndjen se është në një periudhë të qëndrueshme dhe frytdhënëse të karrierës së tij.
Edhe pse nuk përjashton një rikthim eventual në Ligën Premier në të ardhmen, Kane thekson se është “jashtëzakonisht i lumtur” në Munich dhe nuk sheh asnjë arsye për të ndryshuar drejtim.
Ai vlerësoi vizionin e klubit dhe ndikimin pozitiv të trajnerit Vincent Kompany, me të cilin po ndërton një partneritet të fortë. /Telegrafi/