Shefi në ekzil i Hamasit dhe kryenegociatori Khalil al-Hayya, tha të enjten se ky grup ka marrë garanci nga Shtetet e Bashkuara, ndërmjetësit arabë dhe Turqia se lufta në Gaza ka marrë fund në mënyrë të përhershme.
Në një fjalim para publikut palestinez, al-Hayya tha se marrëveshja mes Izraelit e Hamasit do të çojë në një armëpushim të qëndrueshëm, hyrje të ndihmave dhe hapjen e pikëkalimit kufitar të Gazës me Egjiptin, raporton gazeta “The Guardian”.
Al-Hayya tha se marrëveshja e parasheh lirimin e 250 palestinezëve që janë duke e vuajtur dënimin me burgim të përjetshëm në burgjet izraelite, si dhe të 1.700 banorëve të Gazës që janë burgosur nga Izraeli që nga fillimi i luftës.
Ai shtoi se ndërmjetësit dhe Shtetet e Bashkuara kanë dhënë garanci se marrëveshja nënkupton se “lufta ka përfunduar plotësisht”.
Në ndërkohë, Qeveria e Izraelit do të nisë një mbledhje në orën 22:00 sipas kohës locale për të votuar një rezolutë ku përvijohen kushtet e armëpushimit dhe lirimit të pengjeve.
Porsa ta miratojë Qeveria e Izraelit planin, bombardimi i Gazës do të ndërpritet pas 24 orëve.
Hamasi më pas do të ketë tri ditë kohë për t’i liruar pengjet dhe trupat izraelite do të tërhiqen pjesërisht Brenda Gazës sipas vijës për të cilën është arritur marrëveshje.
Sinjali – aty ku e vërteta flet para lajmit!