Hamasi tha të mërkurën se ka kthyer eshtrat e të gjithë pengjeve të vdekur “që mund të gjente”, ndërsa ushtria izraelite tha se Kryqi i Kuq kishte marrë dy trupa të tjerë në Gaza.
Që nga e hëna, sipas një marrëveshjeje armëpushimi të ndërmjetësuar nga presidenti i SHBA-së Donald Trump, Hamasi i ka kthyer Izraelit 20 pengje të mbijetuara në këmbim të gati 2,000 të burgosurve palestinezë të liruar nga burgjet izraelite.
Para se të dorëzoheshin dy trupat të mërkurën vonë, Hamasi kishte kthyer tashmë eshtrat e shtatë prej 28 pengjeve të vdekur të njohur – së bashku me një trup të tetë që Izraeli tha se nuk ishte ai i një ish-pengu.
Por vonë të mërkurën, krahu i armatosur i lëvizjes palestineze tha se kishte transferuar të gjithë trupat që mundi të gjente dhe do të kishte nevojë për pajisje të specializuara për të rikuperuar pjesën tjetër nga rrënojat e Gazës.
“Rezistenca ka përmbushur angazhimin e saj ndaj marrëveshjes duke dorëzuar të gjithë të burgosurit e gjallë izraelitë që janë nën kujdestarinë e saj, si dhe kufomat tek të cilat mundi të kishte qasje”, thanë Brigadat Ezzedine Al-Qassam në një deklaratë në mediat sociale.
“Sa i përket kufomave të mbetura, kërkohen përpjekje të gjera dhe pajisje speciale për rikuperimin dhe nxjerrjen e tyre. Ne po bëjmë përpjekje të mëdha për ta mbyllur këtë dosje”, shtoi ajo.
Njoftimi erdhi ndërsa ushtria izraelite tha se “dy arkivole me pengje të ndjera” ishin transferuar në kujdestarinë e Kryqit të Kuq dhe ishin në rrugën e tyre drejt forcave izraelite në Rripin e Gazës.
“Hamasi duhet të mbështesë marrëveshjen dhe të ndërmarrë hapat e nevojshëm për të kthyer të gjithë pengjet”, tha një deklaratë e përbashkët nga ushtria dhe agjencia e sigurisë izraelite.
Ministri i Sigurisë Kombëtare i Izraelit, i ekstremit të djathtë, Itamar Ben Gvir, ka kërcënuar të ndërpresë furnizimet me ndihmë për Gazën nëse Hamasi nuk arrin të kthejë mbetjet e ushtarëve që mbahen ende në territor. /Telegrafi/