Dërgimi i forcave të FSK-së bë veri, gjegjësisht në liqenin e Ujmanit për të ndihmuar në gjetjen e personit të zhdukur më 27 korrik atje, u bë temë diskutimi, jo vetëm nga aktorët vendorë, por edhe nga ata ndërkombëtarë me shërbim në Kosovë.
Pasi ambasada gjermane reagoi mbi politizimin e kësaj çështje, e madje edhe për propagandën që u bë me fotot e FSK-së në veri nga zyrtarë shtetërorë e aktivistë të partisë në pushtet, duke mos paraqitur edhe pjesëtarët e KFOR-it, edhe Franca doli me një reagim.
Ambasadori i Parisit në vendin tonë, Olivier Guerot, tha se KFOR-i meriton respektin e të gjithëve, jo vetëm në Kosovë, por edhe në rajon.
“Franca mbështet plotësisht KFOR-in dhe Komandantin e tij. Që nga krijimi i tij, KFOR-i ka luajtur dhe vazhdon të luajë një rol të pazëvendësueshëm në sigurimin e sigurisë për të gjithë. Ai meriton respektin dhe mirënjohjen e të gjithë aktorëve në rajon”, tha Guerot, teksa potencoi se “Franca do të vazhdojë t’i ofrojë misionit gjithë mbështetjen e nevojshme në një kontekst ku dezinformimi dhe manipulimi i informacionit po bëhen sistematike”.
France fully supports KFOR and its Commander. Since its creation, KFOR has played, and continues to play, an irreplaceable role in ensuring security for all. It deserves the respect and gratitude of all actors in the region. France will continue to provide it with all the…
— Ambassadeur Olivier Guerot (@Olivier_Guerot) July 29, 2025
https://platform.twitter.com/widgets.js
Ndër të tjera, Guerot shprehu “respekt për mediat që kanë raportuar me saktësi mbi rolin e KFOR-it në përpjekjet për të rikuperuar trupin e personit të zhdukur nga Liqeni” i Ujmanit.
Kujtojmë se gjatë ditës së sotme, ekipet e Kërkim Shpëtimit në Ujëra të FSK-së shkuan në Ujman për të ndihmuar në gjetjen e personit të zhdukur, 33-vjeçarit Rrahim Latifi. Ata edhe e gjetën atë, të pajetë.
Megjithatë, gjetja e trupit të Rrahim Latifit kaloi paksa në rend të dytë. Kjo pasi nga partia që po e mban pushtetin në detyrë, Lëvizja Vetëvendosje, u tentua që FSK-në në veri ta paraqesin si fitore të tyre.
Ministri i Mbrojtjes, Ejup Maqedonci, ndau disa fotografi në profilin e tij në Facebook, duke mos shfaqur pamje të cilat tregonin se automjetet e FSK-së ishin të shoqëruara nga automjete të KFOR-it.
Kjo irritoi një pjesë të opinionit, duke pretenduar madje se LVV-ja kishte manipuluar fotografitë, duke hequr automjetet e KFOR-it nga fotografitë. Por që u kuptua se fotot, ministri i kishte marrë nga media “Kallxo”, mirëpo në mesin e atyre të përzgjedhurave kishte “harruar” të përfshinte edhe ato me KFOR-in.
Në profilet e aktivistëve të LVV-së, në masë të madhe u shpërnda edhe një pretendim që thoshte, “Ushtria e Kosovës për herë të parë po zbarkon në veri”.
Ky pretendim u hodh poshtë nga ish-komandantët e FSK-së, të cilët treguan shumë raste kur FSK-ja, herë si ushtri e herë si forcë mbrojtëse, kishte marrë pjesë në operacione të ndryshme në pjesën veriore të vendit.
Shkuarja e trupave të FSK-së në veri duhet të bëhet në koordinim me KFOR-in, dhe kjo në bazë të një marrëveshjeje të nënshkruar më 2013 mes atëherë kryeministrit Hashim Thaçi dhe shefit të atëhershëm të NATO-së, Anders Fogh Rasmussen.
Edhe shkuarja e sotme ekipeve të Kërkim Shpëtimit në Ujëra të FSK-së u bë në koordinim me KFOR-in, gjë që u konfirmua nga vetë ky mision. /Klankosova.tv
The post Guerot për propagandën me fotot e FSK-së në veri: KFOR-i meriton respektin e të gjithëve appeared first on Klan Kosova.
