Një klub i Ligës Premier ka siguruar tashmë firmën e talentit premtues të Kairat Almaty, Dastan Satpayev.
Të martën mbrëma, Real Madrid rifilloi fushatën e Ligës së Kampionëve për sezonin 2025/2026 me një udhëtim në Kazakistan për t’u përballur me Kairat në stadiumin “Ortalyq” në Pavlodar.
Kjo ishte një ndeshje historike, pasi për herë të parë këto dy klube përballeshin në Evropë, me Kairat që kishte siguruar pjesëmarrjen në Champions pas fitores së kampionatit kazak në vitin 2024.
Megjithëse Mbappe kaloi shpejt Realin në epërsi përmes një penalltie, lojtari që shkëlqeu më shumë në pjesën e parë ishte Satpayev – talenti 17-vjeçar i Kairat.
Por një klub anglez ishte shumë më herët i vetëdijshëm për potencialin e tij dhe ka arritur marrëveshjen për ta transferuar në verën e ardhshme. Chelsea ka nënshkruar me sulmuesin që në shkurt, duke siguruar shërbimet e tij për sezonin e ardhshëm.
Meqenëse rregullat post-Brexit ndalojnë transferimin e lojtarëve të mitur nga jashtë, Satpayev nuk do të mund të bashkohet zyrtarisht me klubin londinez deri në ditëlindjen e tij të 18-të, në gusht të vitit të ardhshëm.
Ndërkohë, tifozët e Kairat do të kenë edhe pak kohë për ta parë nga afër një nga talentet më të ndritura që ka prodhuar klubi, pasi ai vazhdon të impresionojë në skenën evropiane.
Shoku i tij i skuadrës, Luis Mata, foli për cilësitë e jashtëzakonshme të Satpayev në një intervistë për Marca.
“Ai është vetëm 17 vjeç, por është i shpejtë, i fortë dhe përfundon shumë mirë me të dyja këmbët. Ka një potencial të jashtëzakonshëm, dhe për këtë arsye Chelsea e transferoi”, ka thënë ai./Telegrafi/