Ministri i mbrojtjes i Gjermanisë ka paralajmëruar se satelitët e vendit të tij po ndiqen nga satelitët rusë.
Boris Pistorius përmendi shqetësime në lidhje me dy satelitë rusë që ndiqen nga satelitët Intelsat të përdorur nga forcat gjermane dhe të tjerë.
Ai tha në një konferencë hapësinore në Berlin: “Rusia dhe Kina kanë zgjeruar aftësitë e tyre për luftë në hapësirë me shpejtësi gjatë viteve të fundit.”
“Ata mund të prishin operacionet e satelitëve, të verbojnë satelitët, t’i manipulojnë ose t’i shkatërrojnë ata kinetikisht.”
Pistorius nënvizoi edhe nevojën për bisedime mbi zhvillimin e aftësive sulmuese në hapësirë si një faktor pengues, duke treguar përdorimin nga Rusia të dy prej satelitëve të saj Luch Olymp për të ndjekur satelitët Intelsat, shkruan skynews.
Ndryshe, së fundmi ka pasur raportime për shkelje të vazhdueshme me dronë nga ana e Rusisë në hapësirat ajrore të shteteve fqinje.
Këto veprime janë parë si përpjekje për spiunim, provokim dhe testim të gatishmërisë së mbrojtjes ajrore.
Shtetet e Baltikut, Polonia, dhe vendet e tjera të Evropës Lindore kanë raportuar shpesh për fluturime të paautorizuara të dronëve rusë, të cilët herë-herë kalojnë kufijtë dhe shkaktojnë tensione.
Kjo situatë është bërë shqetësuese për aleancat ushtarake, të cilat kanë theksuar nevojën për intensifikim të mbrojtjes kundër këtyre kërcënimeve hibride dhe teknologjike. /Telegrafi/