Numërimi mbrapsht ka nisur. Më 26 mars, Kosova do të përballet me Sllovakinë në gjysmëfinale të plejofit kualifikues për Kupën e Botës 2026. Ndeshja do të zhvillohet në Stadiumin Nacional në Bratislavë.
Përzgjedhësi i Kosovës, Franco Foda, ka punuar intensivisht për përgatitjen e ekipit për këtë sfidë të rëndësishme. Ai dhe ndihmëstrajnerët e tij kanë udhëtuar shumë gjatë muajve të fundit, duke vëzhguar lojtarët dhe duke ndërtuar strategjinë për ndeshjen.
“Kur arrin deri këtu, natyrshëm dëshiron të bësh hapin tjetër. Javën tjetër do të përballemi me Sllovakinë në udhëtim. Nëse kualifikohemi më tej, do të kemi një ndeshje në shtëpi kundër fituesit të duelit Turqi – Rumani”, ka thënë Foda për mediumin austriak “Kronen Zeitung”.
Kosova arriti një kualifikim sensacional për në fazën e plejofit kualifikues për Botëror. Foda ka theksuar forcën e skuadrës së Sllovakisë në shtëpi, por edhe rritjen e cilësisë së ekipit kosovar me lojtarë si Fisnik Asllani, Leon Avdullahu dhe Albioan Hajdari të Hoffenheimit, që kanë zgjedhur të luajnë për Kosovën.
“Sllovakët janë jashtëzakonisht të fortë në shtëpi, gjë që tregoi edhe fitorja e tyre kundër Gjermanisë. Por tani kemi më shumë lojtarë cilësorë në skuadër. Ne kemi fituar tashmë jashtë vendit kundër Suedisë, Sllovenisë dhe Islandës. Kështu që kemi shumë besim. Do të thosha gjasat janë 50 me 50”, tha Foda.
Përzgjedhësi shprehet optimist për një biletë historike për Kupën e Botës 2026 dhe flet për euforinë e madhe të futbollit në Kosovë:
“Rrugës për në redaksinë tuaj, dy kosovarë që jetojnë në Graz më ndaluan në rrugë dhe më uruan suksese për ndeshjen e plejofit. Kjo tregon se të gjithë janë në ankth. Në Suedi gjysma e stadiumit ishte e mbushur me kosovarë. Kjo i jep ekipit energji të jashtëzakonshme. Askush nuk e priste që ne të arrinim në plejof në një grup me Suedinë, Zvicrën dhe Slloveninë. Euforia në vend është e jashtëzakonshme, por ekipi e ka merituar. Të gjithë besojnë te ne”, tha Foda.
Ai ka komentuar gjithashtu për planet e udhëtimit për SHBA, duke thënë se detajet do të bëhen të ditura vetëm pas 31 marsit. “E vetmja gjë e sigurt është se kampi ynë do të vendoset midis Los Angelesit dhe San Franciscos. Nëse shkojmë në Kupën e Botës, do të doja të qëndronim në një hotel për të rinj”, shtoi Foda.
Foda foli edhe për mundësitë e Austrisë në Botëror, duke theksuar se Austria ka mundësi të kalojë grupin e saj, ku ndodhet me Argjentinën, Algjerinë dhe Jordaninë. Pas Botërorit, Austria do të përballet edhe me Kosovën në Vjenë më 27 shtator në kuadër të Ligës B të Ligës së Kombeve.
Nën drejtimin e Fodës, Austria zhvilloi 48 ndeshje nga nëntori 2017 deri në mars 2022, duke regjistruar 27 fitore, 6 barazime dhe 15 humbje. Arritja më e madhe e tij me Austrinë ishte kalimi në 16 më të mirat e Evropianit 2021, ku Austria u eliminua pas kohës shtesë nga Italia.
Në Kosovë, Foda ka dhënë gjithashtu rezultatet e tij më të mira. Nën drejtimin e tij, Kosova siguroi për herë të parë pjesëmarrjen në Ligën B të Ligës së Kombeve dhe më 26 mars do të luajë kundër Sllovakisë në gjysmëfinale të plejofit kualifikues për Kupën e Botës 2026.
Sinjali – aty ku e vërteta flet para lajmit!
