Emir Sahiti ka hedhur poshtë zërat për një konflikt me përzgjedhësin e Kosovës, Franco Foda. Sulmuesi i Hamburgut, i cili mungoi në dy ndeshjet e fundit kualifikuese të Kosovës për Kupën e Botës 2026, ka sqaruar se vendimi për të mos u bashkuar me përfaqësuesen ishte i tij personal.
Sahiti, i cili këtë fundjavë qëndroi në stol për 90 minuta në humbjen 5-0 të Hamburgut ndaj Bayern Munich– për herë të parë pas shtatë muajsh pa një paraqitje zyrtare – theksoi se nuk ka asnjë problem me bashkëlojtarët apo stafin teknik të Kosovës.
“E vërteta është se unë u ftova, por ishte vendimi im të mos grumbullohesha. Nuk ka probleme midis meje dhe shokëve të mi të ekipit kombëtar. Ne jemi të gjithë miq”, deklaroi ai për MOPO.
Emir Sahiti në aksion me Kosovën
Megjithatë, 26-vjeçari shprehu pakënaqësi me disa zgjedhje të formacionit nga Foda, duke nënvizuar se disa lojtarë nuk luajnë në klubet e tyre, por te Kosova po.
“Disa lojtarë janë në formacionin bazë edhe pse nuk kanë luajtur për muaj të tërë me klubet e tyre. Unë luaj për Hamburgun, një klub i madh, dhe ndihem mirë. Nuk është problem nëse nuk jam titullar për arsye sportive, por kur e meritoj, dua të luaj. Për këtë arsye i thashë drejtorit se nuk do të vija këtë herë”, shtoi Sahiti.
Ai nënvizoi se vendimi u mor në bashkëpunim me Samir Ujkanin, dhe se nuk pati bisedë direkte me Fodën para publikimit të listës.
Edhe pse nuk ishte pjesë e skuadrës, Sahiti e ndoqi nga televizioni humbjen 4-0 ndaj Zvicrës dhe fitoren 2-0 kundër Suedisë.
“Isha shumë i kënaqur me fitoren e ekipit tim. E dua vendin tim dhe gjithmonë dua më të mirën për Kosovën”, theksoi ai.
Emir Sahiti te Hamburgu
Sahiti deri tani ka pesë paraqitje me Kosovën, por asnjëherë si titullar. Në Ligën e Kombeve në mars ai u aktivizua nga stoli, ndërsa në periudhën e fundit ka humbur vendin në formacion edhe te Hamburgu, ku Fabio Vieira është parë si përforcimi i ri për repartin ofensiv.
Nëse do të rikthehet sërish në grumbullimet e ardhshme mbetet në dorën e përzgjedhësit Franco Foda, por edhe të paraqitjeve të tij në Bundesligë./Telegrafi/