Të mërkurën, në bankën e dëshmitarit u paraqit James Peter Covey, i cili ishte zëvendës i Përfaqësuesit Special të Sekretarit të OKB-së në Kosovë, misionit UNMIK.
Në pjesën e pasdites, mbrojtja e Hashim Thaçit ia dha Coveyt mundësinë që të tregojë për rolin e diplomatit, të cilin ai deshi ta shpjegojë gjatë pyetjeve të Prokurorisë.
Dëshmitari ka pohuar se i kujtohet vrasja e anëtarëve të Lidhjes Demokratike të Kosovës (LDK) gjatë periudhës së pasluftës.
Përveç kësaj, ai pohoi se i kujtohet edhe vrasja e Xhemajl Mustafës, po ashtu anëtar i LDK-së, raporton “Betimi për Drejtësi“.
“Në pjesën përpara zgjedhjeve po dhe besoj që e kam dhënë një deklaratë për atë rast’, tha dëshmitari Covey.
Sipas një dokumenti të prezantuar nga prokurorja Vega Iodice, Covey kishte thënë se ky akt ndaj Mustafës ishte kryer nga ekstremistë dhe frikacakë që po tentojnë që të pengojnë ecurinë e Kosovës drejt demokracisë.
Covey ndër të tjera tha në Hagë se gjyqtarët janë aty për të mbledhur prova empirike, ndërsa diplomatët shpesh arrijnë në përfundime në bazën e informatave të paplota.
Përveç kësaj, dëshmitari Covey deklaroi se shumicën e dokumenteve që i janë prezantuar, nuk i ka pasur në dispozicion ose nuk i kanë rënë në sy.
Covey tha se nuk është puna e një diplomati që të bëjë vlerësimin mbi bazën e të dhënave të plota.
Gjatë dëshmisë së tij në Hagë, James Peter Covey të mërkurën ka thënë po ashtu se nuk ka njohuri për sulme të drejtpërdrejta ndaj Hashim Thaçit për shkak të deklaratave të tij me thirrje për tolerancë në mes grupeve etnike.
Ai tha se edhe në procese të tjera jashtë Kosovës, deklaratat e tilla i vënin në rrezik njerëzit.
“Nuk kam njohuri për sulme të drejtpërdrejta ndaj tij ose që lidhen me deklaratat e tij, por mendoj që kur e kam përmendur këtë kam thënë në kontekst më të gjerë. Pra, deklarata të tilla, jo vetëm në rastin e Kosovës por në proceset e paqebërjes në përgjithësi, i vënin njerëzit shumë në rrezik nga pikëpamja politike, por edhe personale e fizike”, tha dëshmitari.
Si rrjedhojë, Covey u pyet se a ka dijeni që UÇK-ja shënjestronte LDK-në dhe FARK-un.
“Kam më pak njohuri për shënjestrimin e LDK-së, por po jam në dijeni të faktit se kishte raporte sa i takon asaj që ata shenejstronin FARK-un”, tha ai.
Në Speciale lexohen pjesë të ditarit të gjeneralit gjerman Reinhardt: Thaçi sillej si një fëmijë kur nuk ia japin lodrën e tij, lodra që dëshiron është Presidenca
Gjenerali gjerman, Klaus Reinhardt, i cili ishte pjesë e komandës së KFOR-it në Kosovë, në ditarin e tij gjatë 1999-ës kishte thënë se Hashim Thaçi sillej si një fëmijë që nuk iu jepej lodra e tij.
Sipas ditarit që lexoi prokurorja Vega Iodice, gjenerali Reinhardt kishte thënë për Thaçin se lodra që dëshiron është Presidenca e Kosovës dhe udhëheqja politike në ombrellën e Administratës së Bernard Kouchnerit.
Përpara kësaj, prokurorja tha se në ditarin e tij, gjenerali Reinhardt kishte thënë se në nëntor të 1999-ës, Bernard Kouchner e ka njoftuar se “Thaçi i ka deklaruar luftë atij dhe UNMIK-ut sot”.
Sipas librit, Thaçi kishte thënë se ishte lodhur nga mosefikasiteti dhe se ai e kishte mbështetjen e kryeqyteteve të rëndësishme siç ishte Uashingtoni, si dhe do ta bojkotonte UNMIK-un dhe KFOR-in deri sa ata të zbatonin dëshirat e tij.
Po ashtu, duke iu referuar librit, prokurorja tha se aty thuhet që Reinhardt kishte thënë që duhej të fliste menjëherë me Thaçin pasi nuk ka kuptim asgjë prej kësaj dhe nuk është i gatshëm për të vazhduar bashkëpunimin më atë mbi këtë bazë.
Ndërsa, më 16 nëntor 1999, në ditarin e vet, Reinhardt kishte thënë se Thaçi po e bojkoton takimin e Komitetit dhe refuzimi për bashkëpunim tregon përbuzje për institucionin dhe anëtarët e tjerë të Komitetit të Përkohshëm.
“Sillej si një fëmijë kur nuk i japin pikërisht lodrën e tij dhe lodra që dëshiron është Presidenca e Kosovës dhe udhëheqja politike në ombrellën e Administratës së Kouchnerit”, citohet të ketë thënë Reinhardt për Thaçin.
Dëshmitari James Peter Covey tha se me gjithë admirimin për Reinhardtin, ai e ka ekzagjeruar këtë pjesë.
“Më gjithë admirimin që kam për gjeneralin Reinhardt, këtu e ka ekzagjeruar atë çështje. Pika që ngrihet këtu është që sikur nuk do të ishte një përpjekje për të, drejtuesi politik i një procesi diplomatik e social përveçse politik. Ne kemi patur ditë të mira dhe ditë të këqija. Kjo ishte një taktikë. Thaçi u kthye në Këshillin Provizor jo shumë më pas dhe nuk ishte hera e parë që u largua nga ky takim. Nuk ishte në fakt as anëtari i parë dhe as i fundit që u largua nga një rast apo tjetër, kur ishin të frustruar”, tha dëshmitari.
Krahas kësaj, Covey tha se sjelljet e ngjashme si të Thaçit, nuk ishin për t’u çuditur gjatë asaj kohe.
“Unë them që karakterizimi i tij- i një fëmiu që mërzitet, në fakt e ilustron seriozitetin e pjesëmarrejes së tij në këtë Këshill Provizor. Këtë e bën për t’u përkujtuar të gjithë pasuesve të tij se sa serioz ishin në punën e tyre apo kur kërkonin të nxirrnin përfitime nga bashkëpunimi me UNMIKU-t. Këto nuk ishin të çuditshme si zhvillme dhe nuk kanë zgjatur për kohë të gjatë”, tha Covey.
Kurse, në një shënim të datës 8 dhjetor 1999, prokurorja lexoi se thuhej që “Thaçi u kthye në një aktor; është hera e parë që prej 27 tetorit 1999 që shfaqet ai në Komitet. Madje, ai nuk heq as pallton që ka veshur por fillon një bisedë apo sulm agresiv kundër UNMIK-ut dhe KFOR-it. Inati i tij përshkallëzohet me çdo fjali që thotë dhe akuzon si në vijim: në fund të faqes thotë; ai nuk lejon asnjë njeri që ta nderpres, është i zëmëruar dhe në fund të kësaj bisede ofron që ta rifillojmë bashkëpunimin ekskluzivisht sipas kushteve të tij, me fjalë të tjera nën presidencën e tij”.
Duke ndjekur këtë linjë pyetjesh, prokurorja Iodice vazhdoi me leximin, duke thënë se në shënimin e njëjtë, thuhet se Reinhardt tha se Thaçi ka thënë që “nëse nuk do të përmbushet kjo kërkesë, ai do të refuzojë ndonjë bashkëpunim në të ardhmen. Pas kësaj deklarate del me furi nga dhoma si Prima Donna në një komedi”.
Reinhardt kishte vazhduar duke thënë se “është për të qeshur, në mos për të qarë” pasi Thaçi nuk po iu jepte mundësi as të diskutojnë për akuzat që ka ngritur.
Dëshmitari Covey tha se nuk e di që gjenerali Reinhardt ka mbajtur ditar.
The post Dëshmitari Covey thotë se i kujtohen vrasjet e anëtarëve të LDK-së pas luftës appeared first on Klan Kosova.